Eqqissisimasumik isummersoqatigiiffeqarnissaq Ruslandip aalajangiusimagaa
Issittumi Siunnersuisoqatigiit eqqissisimasumik katersuuffiunerisa attatiinnarnissaat pingaaruteqarpoq, aaqqiagiinnginnerillu Ukrainemi pisutut ittut akuliussuunneqartariaqanngillat. Nunat arfineq pingasut Issittumi Siunnersuisoqatigiinni ilaasortaatitaqartut erseqqissumik taama nalunaaruteqarput.
Taama nalunaaruteqartoqarnera Danmarkimi nunanut allanut tunngasunut ministerip nuannaarutigaa.
- Taama ingerlaannartoqarnissaa pisinnaassanngikkaluarpalluunniit, maannamut iluatsilluarpoq, Martin Lidegaard oqarpoq.
Russit oqaaqqissaarneqartut
Canadamiut ataatsimiinnermik aaqqissuisuusut Canadamiut siulittaasuutitaqarneranni siulittaasuusup Leona Aglukkap neriorsuutigineqareersutut Ruslandip Ukrainemut pissusilersornera sakkortuumik isornartorsiorpaa. Isornartorsiuinermut ilaatigut pissutaalluni, Canadami innuttaasut ilarpassui Ukrainemit kingoqqisuunerat.
Allaammi Russit savaaqqatut sallaatsigipput. Russimmi avatangiisinut ministeriata Sergej Dolstoip erseqqissarpaa, Issittup aaqqiagiinngiffiunissaa kissaatigineqanngitsoq aamma Issittumi Siunnersuisoqatigiit aaqqiissutissanik ujartuiffiunissaat aaqqiagiinngissutinillu malersuiffiunnginnissaat Ruslandip pingaartikkaa.
Suulli tamaasa nuannaajallannartortaqanngillat
Taama nalunaaruteqarnerit Danmarkimi nunanut allanut tunngasunut ministerip qiimmaallaatigai.
Russit qaammatini makkunani sorpassuarnut tunngasunut oqaaseqartarput, tamakkulu tamarmik qiimmaallannartuunngitsut oqartoqarsinnaavoq. Ullumikkulli oqallilluartugut isumaqarpunga, qularutiginngilaralu aaqqiagiinnginnerit Ukrainemi pisutut ittut maani akuutinneqannginnissaat, Russit uatsitulli soqutigisarigaat. Allanimmi isumagisassarpassuaqarpugut, Martin Lidegaard KNR-imut oqarpoq.
Aamma atuaruk Ukrainep saqitsaassutigineqarnera Issittumi eqqissiviilliuutaasoq
Aamma Issittumi Siunnersuisoqatigiit kinguneqarluartumik katersuuffiunerisa nalinginnaanngilluinnarnera attatiinnarneqartariaqartoq Lidegaard isumaqarpoq.
- Ullutsinni nunarsuaq qiviarutsigu nerrivimmi issiaqatigiilluta Issittumi unammilligassat periarfissallu isumaqatigiissutigisinnaagatsigik asseqanngilaq. Unammilligassallu ataatsimoorluta killilerniassavavut periarfissanillu siuarsaalluta, Martin Lidegaard naggasiivoq.
