Eqqissisimasimaqaat
Sinerissami ippassaq unnukkut unnuarlu inuit eqqissisimasimaqisut politeeqarfinnit attaveqarfigisatta ualigaa oqaatigaat, erseqqinnerusumik oqaatigalugu Nuummi, Sisimiuni Nanortalimmilu.
Nanortallilli politeeqarfiani pisortaq Poul Petersen nuannerpallaanngitsumik tusagassaqartitsivoq tassa pingasunngornerup sisamanngornerullu unnuaani ataatsip missaanit Alluitsup Paani illu inoqanngitsoq ikuallalersimasoq ajoraluartumillu ullaanngoriartornerani aatsaat qaminneqarsimalluni tassalu aatsaat nunguusavilluni. Poul Petersen oqaluttuarpoq illup piginnittua tamatuma nalaani Nanortalimmiissimasoq politiinillu inuttut ikiorneqartariaqarsimasoq sulilu ikiortariaqassalluni. Illup ikuallanneratigut inunnik ajoqusertoqanngikkaluarpoq, kisianni inuttaanut quarsaarnarsimaqisoq Nanortallip politeeqarfia nassuiaavoq.
Politeeq immikkut ilisimasalik piaarnerpaamik maanna Alluitsup Paanukartinniarneqarpoq misissuiartortillugu, tamatumalu saniatigut Nanortalimmi politiit annerusumik oqaaseqarsinnaannginnerarput.
Ilimanamillu ajoqi Amalie Lange ungasinngitsoralannguakkut nalunaarpoq Ilimanami tallimanut naalagiarnissaagaluaq taamaatiinnarneqarmat anorlerpallaarlunilu oqaluffik qiianarpallaarmat.
