Eqqissiinnarit – borgmesteri ajoqusinngilaq
Qeqqata kommuneani sanaartortitsinermik suliallit illussanillu titartaasartut isumasioqatigiinnertik ilutigalugu peqataasut 40-t missai, Borgmesteri piumassutsiminik peqataasuliullugu, innarluutillit ulluinnarni atugaat timitalerlugu misilippaat.
-Peqataasut tamarmik qamutinik kaassuartakkanik atortuleriarluta hoteli kaajallapparput, majuartarfitsigoorluta matut assigiinngitsut aqqusaarlugit, taava nammineq ingerlaniarsarivugut uppinnissarput mianersorfigiinnarlugu, aammalu taava tappiitsutut isigisaqarata aamma illup iluani kaaviaartitaavugut. Taamatut misiliinerput soqutiginartorujussuusut taamaalilluta ilikkarparput suut ulluinnarni innarluutillit naammattoortagaat mianersuuttariaqartut pilersaarusiornermi assigiinngitsuni, Hermann Berthelsen oqarpoq.
Sisimiuni innuttaasut ilaata sanaartukkat 2007-mi akuersissutigineqarsimasut innarluutilinnut tulluarsagaanngitsut pillugit siorna Sisimiut kommunerisimasaanik unioqqutitsineraanermini ombudsmandimiit ilalerneqarpoq, KNR-ikkut ilanngutassiarineqarpoq. Tamanna pissutaanerluni Borgmesterip soqutiginnilerneranut.
- Tamatigut tassanngaannit pisuungilaq, kisianni allanngortiterinerit aammalu siunissamut eqqarsarluta pisinnaanissagut uani pinerullugit pivagut, taamaammat nalinginnaasumik eqqarsaatigereernikuuarput taamaaliortarsinnaanerput, aamma piffissaq taamaalillugu ulluni makkunani pinera tulluaannarpoq, nangippoq.
Innarluutillit atugaannik misiliinini Borgmesterinut allanut kajumissaarutigisinnaakutsoorpaa.
- Tassa borgmesterinuinnaanngitsoq kisiannili kommuneni aamma allanut illoqarfinnut allanulluunniit taamatut eqqarsaateqarusussinnaasunut kajumissaarutigikutsoorsinnaavara, nuannersorujussuuvoq aamma kommunet oqassaagut immaqa saassutarineqaannavinnissaannut millisarnissaannut atorneqarsinnaavoq taamaalilluta inuit tamatta sunilluunniit suliaqaraluarutta paaseqatigiinnerulernissatsinnik anguniagaqartugut, kajumissaarutigikutsoorpara politikerinuinnaanngitsoq kisianni ulluinnarni suliaqartunut, borgmesteri kaammattuivoq.
