Eqqiluisaarneq akissarsissutaasarpoq

Namminersorlutik Oqartussat Pinngortitamik Avatangiisinullu mianerinninneq pillugu nersorinnilluni 2012-imi akissarsiaq Iluliarmiumut Karl Lyngemut tunniunneqarpoq.
januaarip 22-at 2013 11:15

Ukiorpassuarni illoqarfimmi takussaajuartuuvoq, aammali sulinermini sunngiffimminilu eqqakkanik katersisarnera amerlasuunit maluginiarneqarsimavoq. Avatangiisinillu mianerinninnissamik soqutigisaqarnini soraarninngornermini aalluttuarsinnarpaa.

Ilaatigut tamakku tunngavilersuutigalugit Namminersorlutik Oqartussat Pinngortitamik Avatangiisinullu mianerinninneq pillugu nersorinnilluni 2012-imi akissarsiaq Iluliarmiumut Karl Lyngemut tunniunneqarpoq.

Akissarsisitsineq Ilulissani januaarip 18-iani katerisimaanermi pivoq.

-  Karl Lynge, soraarneq, ukiuni amerlasuuni Ilulissat illoqarfiata saligaatsuunissaa isumagisaraa. Eqqakkanik katersuiuartuusimavoq, suligaluaruni sulinngikkaluaruniluunniit. Karl Lynge illoqarfimmi suli saliinnermik isumagisaqartarpoq, taamaaliortarneralu illoqarfimmut Ilulissanut annertuumik pingaaruteqarpoq, pinngortitamut avatangiisinullu naalakkersuisoq Anthon Frederiksen akissarsititsinermut atillugu oqarpoq.