Eqqillit ikiortissarsiorlutik takkuteriasaarput

Eqqillit 89-it naggueqatigiinneersut avammut attaveqarsimanngitsut ikiortissarsiorlutik Brasiliami Amazona-p naalagaaffianiittumut, Pará-mut, takkuteriataarsimapput. Kikkut tamarmik isumaqarsimapput eqqillit taakku ukiorpassuit matuma siiornatigulli toqorarlutik nungoreersut.

Aviisi Jyllands Posten taama allaaserisaqarpoq.

Eqqillit taakku 89-it, naggueqatigiinnit Metyktirikkunneersut, ulluni tallimani kiattup orpippassuatigoorsimapput, ilimagineqarpoq qaarusummi sulisunit imaluunniit orpippassuarni orpinnik pilattuisartunit qimaasimassasut, nunarsuarmi kisiartaalluni naggueqatigiilerineq pillugu suliniaqatigiiffik, Survival International, tusagassiutinut taama nalunaaruteqarpoq.

Naggueqatigiit Metyktirikkut naggueqatigiinnut Kayapó-kkunnut ilaasuupput, Kayapó-kkullu brasiliamiunut 1950-ikkunni aatsaat attaveqalersimapput. Ukuli eqqillit Metyktirikkut avammut attaveqannginnissartik namminneerlutik qinersimavaat. Taamaammat naggueqatigiippassuit isumaqarsimapput naggueqatigiit taakku ukiut ingerlanerini nungoreersimassasut.

Metyktirikkut immikkoorluinnarsimasut ukiut 50-it qaangiutillartullu naggueqatigiinnik allanik takunertik tupassutigeqqaaraluariarlugu, tuppallernermik killitsinnermillu erinarsorlutik qittallutillu aallartissimapput. Erinarsornerat immiunneqarpoq, radiokkullu kingusinnerusukkut aallakaatinneqarluni, inuiaqatigiit Kayapókkut allat taamaalillutik aamma tusarnaarsinnaaqqullugit.

Suliniaqatigiiffimmi Survival Internationalimi pisortaaneq, Stephen Corry, naapertorlugu, naggueqatigiit avammut attaveqanngitsut nunarsuaq tamakkerlugu 100-t sinneqarput. Ataannarnissaat inunnit nunap inuiisa nunaannik tiguaaniartunit navianartorsiortitaavoq.

- Eqqillit Metyktirikkut sooq attaveqarnialersimanersut sapaatip akunnerini tulliuttuni immaqa paasiumaarparput, Stephen Corry oqarpoq.