Eqqartuussut oqaluttuarisaanermut pingaarutilik nunat inuiisa persuarsiutigaat
Eqqartuussiviit qullersaata ippassaq eqqartuussuteqarnerani inuiaqatigiit indianerit Tsilhqot’in ajugaanertik qulakkeeramikku persuarsiorput.
Indianerit eqimattat ikittunnguit ukiut 20-t matuma siorna eqqartuussassanngortitsisimapput. Inuiaqatigiit eqimattakkaanut arfinilinnut agguataarsimasut 3000-nik inuttaqarput.
- Siunissami Canadamiut allat isumakkeerfigeqatigalugit siunissarput neriunartoqarnerulerpoq, høvdingit qullersaat, Steward Philip, CBC Newsimut oqarpoq.
Eqqartuussummi pineqartoq tassa, British Columbiami nuna 1700 kvadratkilometerisut angitigisoq, indianerit ileqqutoqqat naapertorlugit piniarfigalugulu aalisarfigisartagaata, 1983-imi orpinnik nioqqutissiorfittut akuerineqaraluartup maannakkut tsilhqot’in-indianerinut uterteqqinneqarnera.
Taakkua siornatigut eqqartuussinikkut sumiiffimmi piniarsinnaatitaallutillu aalisarsinnaatitaalernikuugaluarput, maannakkulli nunamik piginnittutut pisinnaatitaaffeqalernerat eqqartuussisutigut aalajangerneqarpoq. Tamatuma saniatigut, eqqartuussummi ”nunat inuiisa pisinnatitaaffii” iliuutsitigut inatsisitigullu qanoq kinguneqartinneqartariaqarnerat erseqqissarneqarluni.
Eqqartuussut Canadami sumiiffinni assigiinngitsuni nunat inuiinut annertuumik pingaaruteqalersinnaavoq – soorlu Canadap avannarpasinnerusortaani nunap inuiisa najugaqarfiitigut ruujorikkut uuliamik assartuiffiginiagaq pillugu saqitsaattoqarneranut atatillugu.
British Columbiaannarmi nunap ilai, nunap inuiisa hunnorujulikkuutaat oqartussallu isumaqatigiinngissutaat suli naammassineqanngillat. Inatsisilerituup qullersat innuttanut pisussaaffii pillugit immikkut ilisimasallip oqaatigaa, maannakkut Eqqartuussiviit qullersaata aalajangiinera, Canadap kangiani Quebecimi nunap 40 procentiata aalajangiiffigineqarnissaanut atorneqarsinnaassasoq.
