Eqqartuussut naammassigallarpoq

maajip 12-at 2005 11:41

Kalaallit Nunaata Radioata nutaarsiassaqartitsivimmi pisortaasimasumik Najattaaq Mathiassenimik soraarsitsisimanera pillugu ulluni marlunni eqqartuussivilersuussineq naammassivoq.

Nunatta Eqqartuussiviani eqqartuussisoq Søren Søndergård Hansen inerniliineq pillugu sapaatip-akunneri marluk missaat qaangiuppata nalunaarutigineqarsinnaassasoq, KNR-ip eqqartuussisuserisua Wilhelm Malling oqarpoq.

Najattaaq Mathiassen sinnerlugu Atorfillit Kattuffiat AK KNR-imik eqqartuussivilersuussisuuvoq. Najattaaq Mathiassen isumaqarpoq, KNR-imit soraarsitaanini pissusissamisoorsimanngitsoq.

Eqqartuussivilersuussineq ippassaq naammassineqarpoq, takunnittullu 15-it apersorneqarsimallutik.

Najattaaq Mathiassen sinnerlugu AK 200.000 koruuninik KNR-imut piumasaqarpoq, tamatumalu saniatigut soraarsitsineq atorsinnaasumik tunngaveqarluni suliaasimanngitsutut Nunatta Eqqartuussivianit nalileqqullugu.