Eqqartuussivinni suliassat utaqqiinnartut Folketingimi oqaluuserineqarput
Siumup Folketingemut ilaasortaatitaa, Doris Jakobsen, Inuit Ataqatigiit ilaasortaatitaat, Sara Olsvig, peqatigalugu, eqqartuussivinni suliassanik katersuutiinnalersimasunik aaqqiisoqarnissaanik piffissaq sivisooq atorlugu sulissuteqarsimasut, nuannaaruteqarlutik Folketingep oqaluttarfianit Doris Jakobsen oqaaseqarpoq.
- Inuiaqatigiinni inatsisitigut inunnik illersuinermik tunngaveqartuni taama sivisutigisumik eqqartuussivinni suliassanik utaqqiffiusarnerat tulluanngilaq - pinerluttoqarsimatillugu, imaluunniit suliassat nalinginnaasumik eqqartuussivinni suliarineqartarneri, eqqarsaatigalugit. Ullumikkut utaqqisarnerujussuit inuit inuuneri ukiorpassuarni unittoortittarpaat - unnerluutigineqarsimagunik, aamma illunik niuernerni imaluunniit aningaasanik niuernermi utaqqikatattoqalersarpoq, soorlu aningaaseriviit aningaasaliisartullu allat pigisat nalingini aalajangiiniarnermi utaqqerujussuartarnerat pissutigalugu, Doris Jakobsen erseqqissaavoq.
Siunissaq ungasinnerusoq isigalugu utaqqisarnerit qanoq sivisutigisut akuersaarneqarsinnaanersut Inatsiseqarneq pillugu Naalakkersuisoq Karen Hækkerup Doris Jakobsenip qinnuigaa akeqqullugu.
- Allatut ajornartumik utaqqisarnerit pillugit siunniussaqartariaqarpugut, taamaalilluta ukiut pingasut qaangiutiinnartut immikkut suliniuteqarneq oqallisigeqqinnginniassagatsigu, Doris Jakobsen oqarpoq.
Inatsisissatut siunnersuuteqarnermi danskit inatsisilerituut misilittagaqarluartut Kalaallit Nunaanni eqqartuussivinni unnerluussisutut eqqartuussisutullu suligallarsinnaapput.
