Assi: Simon Uldum

Nalunaarusiaq nutaaq Eqqartuussivinni oqalutseqarneq pitsaanerusariaqarpoq

Pinerluuteqartut pillugit Kalaallit Nunaanni eqqartuussivinni suliani oqalutseqarnikkut unammillernartoqarpoq. Ilisimatusarfimmiit aamma Inuit Pisinnnaatsitaaffiinut Institutimiit misissuinerit nutaat tamanna takutippaat.

Kinaluunniit pinerluuteqarsimasutut unnerluunneqartoq eqqartuussivimmi oqaatsit paasisinnaanngikkunigit atorsinnaanngikkunigilluunniit inuit pisinnaatitaaffii malillugit akeqanngitsumik oqalutseqarsinnaatitaavoq. 

Taaguutinut allattuivimmik ataatsimoorussamik amigaateqarneq, piffissap piareersarfiusup sivikinnera aamma sumiorpaluutit assigiinnginnerisa Kalaallit Nunaanni pinerluttulerinermi suliani inatsisitigut isumannaatsuunissaq unammillernartuutippaa. Inuit Pisinnaatitaaffiinut Instituti tusagassiuutinut nalunaarummini taama aallappoq. 

- Kalaallit Nunaanni inuit assigiinngitsunik oqaaseqarput sumiorpaluuteqarlutillu. Taamaattumik pingaarluinnarpoq eqqortumik nutserisoqarnissaq unnerluutigineqartut inatsisitigut innarlitsaaliugaanissaat qulakkeerniarlugu, Ilisimatusarfimmi Nutserinermut Oqaluttaanermullu Immikkoortortaqarfimmi aqutsisoq nalunaarusiamilu allaaserinneqataasoq Laila Hedegaard Pedersen, oqarpoq.

Misissuinerup tunngavigai unnerluussat eqqartuunneqartullu akornini immersugassat atorlugit aamma ataasiakkaarlugit eqimattakkaarlugillu apersorlugit misissuineq, kiisalu eqqartuussisut, eqqartuusseqataasartut, unnerluussisut illersuisullu immersugassat atorlugit apersorlugit misissuineq.

Kalaallit Nunaanni eqqaartuussivinni oqalutseqarnerup nutserinerullu pitsaanerulernissaa pisariaqartinneqartoq misissuinerup takutippaa, immikkoortullu pingasut immikkut iliuuseqarnissamik pisariaqartitsiviusut nalunaarusiami tikkuarneqarput:

Nutserinermi sinaakkutit, kalaallit sumiorpaluutaannik nutserisullu piginnaasaannik aaqqiineq.

- Tamanna unnerluunneqartup inatsisitigut isumannaatsuunissaanut aalajangiisuusumik eqqartuussivinni oqaatsit sumiorpaluutillu akimorlugit eqqortumik paasinninnissamut pingaaruteqarpoq.Taamaattumik Kalaallit Nunaanni eqqartuussivinni nutserinerup pitsaassusaata pitsanngorsaaffigineqarnissaa assigiissaarinerlu pisariaqartinneqarpoq, Laila Hedegaard Pedersen oqarpoq.

Nunat assigiinngitsut akornanni inuit pisinnatitaaffii pillugit pisussaaffiit kingunerisaannik nutserunneqarnissamut pisinnaatitaaffik tunngaveqarpoq, pingaartumik Den Europæiske Menneskerettighedskonventionip aalajangersagaani immikkoortoq 6 naapertuarluartumik eqqartuunneqarnissamut pisinnaatitaanermik imaqartoq.

Oqaluttarissatigut oqalutseqarnerup saniatigut, allagartat uppernarsaatit allattarissatigullu oqaaseqaatit, pineqartup pinerlunnermi suliarineqarnerani qanoq pisoqarneranik paasinninnissaanut pisariaqartut nutserunneqarnissamut pisinnaatitaaffimmut ilaapput. Ilutigalugu unnerluunneqartoq pisinnaatitaaffeqarpoq eqqartuussisunut paasinartuunissaminut.

Misissuineq tamaat  uani: atuaruk.

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl