Eqqartuussivimmut tunniussinialerput

Savalimmiuni umiarsuaatilik Smyril Line aalajangermat, Shetlandimi qeqertaaqqaanut angallassisarnerminik unitsitsiniarluni, qeqertaaqqat eqqartuussivimmut tunniussinissaq aalajangerpaa.

Shetlandimi qeqertaaqqani aningaasaateqarfik pisortanit pigineqartoq, 2001-mi Smyril Line-mut 45 millioni koruuninik aningaasaliisimavoq. Taamani ikaartaat Norrøna 700 millioni koruuninik akilik sananeqarpoq.

- Shetlandimut angallassisarunnaarnissaq pakatsissutigeqaarput, Norrøna-mummi aningaasaliissuteqangaatsiareeratta, Shetlandip qeqertaaraani aningaasaateqarfimmi siulittaasoq, Josie Simpson kamaqqaqisoq taama oqarpoq.

Ilaasartaat Norrøna Savalimmiut, Island, Shetland-mi qeqertaaqqat, Norge Danmarkilu aqqusaarlugit angalasarpoq, Smyril Line-illu ingerlaarfimminik allannguinermigut Shetlandip qeqertaaraanut angalasarunnaarluni Skotland-imi Edinburgh-ikkut Aberdeen-ikkulluunniit angalasalissaaq.

Smyril Line-ip qeqertaaqqanut angalasarnini isertitsissutigivallaartarsimanngilaa, taamaammallu Skotland-ikkoortarnissaq aningaasarsiutissatut kajungernarnerusutut isigalugu. Tamannarpiaq pillugu Shetlandip qeqertaarai eqqartuussivimmut tunniussiniarput.