Eqqartuussivimmut sassartinneqassapput

Nunatsinni politiinit tigusarineqartut nalunaaquttap akunnerisa 24-t iluanni eqqartuussivimmut sassartitaanissaat nalinginnaasuuvoq, kisianni Greenpeacemi inuttat akuerineqaratik qillerivimmut qaqisut, kingornalu politiinit tigusaallutik, allatut pineqassapput.
septembarip 03-at 2010 09:58

Tassami eqqartuussisunut ullup unnuallu ataatsip ingerlanerani sassartinneqartariaqanngillat, nunanut allamiunut tunngatillugu inatsisit atuuttussaammata. Tigusat ullut pingasut iluanni eqqartuussisunut sassartinneqarnissaat inatsimmi tassani piumasaqaataavoq.

Greenpeacep akerliussutsimik takutitsisui sisamat tigusarineqartut qaqugorpiaq eqqartuussisunut sassartinneqassanersut suli aalajangerneqanngilaq.

- Naluarput inuit sisamat taakku suneqassanersut. Misissugassaqaqaagummi, suli aalajangigaqanngilagut, Politimestereqarfimmi inatsisileritooq, Helle Olesen, oqarpoq.

Greenpeacermiut pingasunngornerup sisamanngornerullu akornani unnuakkut tigusarineqarput. Eqqartuussisunut sassartinneqassagunik kingusinnerpaamik arfininngornerup sapaatillu akornanni unnuakkut pisariaqassaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq