Eqqartuussivimmi suliaq ullumi naammassineqassasoq
Tassani Siumumut Partii Naleqqamullu allataanerusimasoq, Mikael Petersen pineqarpoq.
Arnat sisamat, Siumup Nuummi allaffeqarfiani sulisimasut kannguttaatsuliorsimasutut unnerluuppaat.
Mikael Petersenili pinngitsuunerartarpoq.
Taassuma ulluni 60-ini pineqaatissinneqarsimasunut inissiisarfimmiinnissaa unnerluussisussaatitaasut piumasaraat.
AAMMA ATUARUK Kannguttaatsuliorneq pillugu suliami arnat arfinillit ilisimannittuusut
Eqqartuussissoqarfik Sermersuumi suliaq sapaatit akunnerata siuliani aallartimmat ilisimannittut qulingiluat nassuaatinneqarput. Taakkununnga Siumumit folketingemut ilaasortaq, Aki-Mathilda Høegh-Dam ilaavoq. Taanna arnanut unnersuussisunut sisamaasunut aamma ilaavoq.
Ilisimannittunilli allanik suli nassuiaasoqassaaq. Taamaattumik eqqartuussivimmi suliaq qulingiluanut aallartittussaq, ullup ingerlanerani naammassineqarnissaa naatsorsuutaavoq.
KNR eqqartuussivimmi malinnaassaaq, pisorlu pillugu nutaarsiassiiumaarluni.