Eqqartuussivimmi suliaq kukkusaq

decembarip 07-at 2004 07:17

Politiit Nuup eqqartuussivianut suliffeqarfimmik unioqqutitsisimasumik kukkuluttorlutik suliassanngortitsinerat pissutaalluni suliassaq aallaqqaataaniit suliarineqartussanngorpoq.

Suliffinnut tunngasunik eqqartuussivimmut suliassanngortitsinermi nunatta eqqartuussivia aqqutigineqartussaavoq. Suliassanngortitsinermilu pineqartumi suliffeqarfiup piginneqatigiiffiunera pissutaasoq, taamaammallu suliassaq politiinut utertinneqarsimasoq, eqqartuussisoq Mille Søvndahl Pedersen oqarpoq.

Nuummi politiit kukkuluttortoqarsimanera nassuerutigaat, pisorlu ajuusaarutigalugu.

-Suliassanngortitat amerlangaarmata kukkuneq pivoq, vicepolitikommissær Janus Eigaard oqarpoq.

Politiit Nuullu Eqqartuussiviata suliffeqarfik unnerluutigineqartoq aktieselskabiusoq arajutsisimavaat. Suliffeqarfik eqqartuussivimmi pinngitsuutinneqaraluarpoq, suliassarli politiinut utertinneqarpoq, politimestereqarfiullu Nunatta Eqqartuussivianut ingerlateqqissavaa.

Suliffeqarfik unnerluutigineqartoq 18-nit inorlugit ukiulimmik sulisoqarsimavoq, niaqqumigullu illersuuteqarsimanngimmat eqqartuussivimmut suliassanngortinneqarluni.