Eqqartuussisoqarfiup arnaq taanna politiinit aaneqartussanngortippaa, politiinilli nassaarineqarani. Taamaammat arnaq taanna nassuiaanngikkaluartoq suliaq ingerlanneqartariaqarsimavoq.Assi: KNR

Eqqartuussivilianngitsoortoq: 18.000-nik akiligassinneqarlunilu 1.500-nik akiliisinneqassasoq

Arnaq ilisimannittoq Tasiilamiit angalanerminut akiliunneqarpoq, eqqartuussivilianngitsoorlunili.

Ilisimannittutut aggersakkatut eqqartuussivilianngitsoorneq akisoorujussuusinnaavoq. 

Tasiilamiit Nuuliarluni akunnittarfimmi najugaqartitamut taamaappoq. 

Arnap taassuma tamanna uppernarsivaa, taannalu 20.000 koruunit missarluinnaannik akiligassaqalertussanngorpoq. 

Arnaq taanna pinerluttulerinermi suliamut atatillugu ilisimannittutut nassuiaajartorluni eqqartuussisoqarfiup akiligaanik timmisartorluni Tasiilamiit Nuuliarpoq. Arnarli taanna eqqartuussivilianngitsoorpoq, politiiniillu nassaarineqarsinnaasimanani. 

Arnaq taanna Tasiilamiit Nuummut arfininngornermi tikikkami akunnittarfimmut unnuiffissaatut inniminniiffigineqarsimasumut inissippoq. Ilisimannittutut Eqqartuussisoqarfik Sermersuumi ataasinngornermi nassuiaasussaasimagaluarpoq, takkutinngitsoorlunili.

Eqqartuussisoqarfiup arnaq taanna politiinit aaneqartussanngortippaa, politiinilli nassaarineqarani. Taamaammat arnaq taanna nassuiaanngikkaluartoq suliaq ingerlanneqartariaqarsimavoq.

Eqqartuussisoqarfiup arnaq taanna angalanerminut Nuummilu ineqartitaallunilu nerisaqartitaanerminut aningaasartuutaasunik 18.161,50 koruuniusunik taarsiisussanngortillugu akiligassillugulu 1.500 krouuninik akiliisittussanngorpaa. 

- Ilisimannittutut nassuiaanerit pinerluttulerinermi suliamik inerniliinermut pingaaruteqarsinnaasorujussuusarput, unnerluussisussaatitaaneq Morten Nielsen oqarpoq.

- Taamaammat ilisimannittutut nassuiaajartortussatut aggersagaq takkutinngitsooraangat kipiluttunartorujussuartut isigineqartarpoq, ingammik angalanerminut akiliunneqarsimagaangat. Taamaaliorneq akuersaarneqarsinnaanngitsoq, eqqartuussisoqarfiup aalajangernermini erseqqissarpaa, tamannalu naammagisimaarpara.

Ilisimannittut eqqartuussivimmut nassuiaajartortussatut aggersagaasimagaanni pinngitsoorani aggernissaq eqqartuussisarnermut inatsit naapertorlugu piumasaqaataavoq. 

Napparsimalersimagaannili allamilluunniit peqquteqavikkaanni takkutinngitsoortoqarsinnaavoq. Takkussinnaanngikkaannilu tamanna piaartumik ilisimatitsissutigineqartussaavoq. Ilisimannittutut illoqarfimmut allamut nassuiaajartortut angalanerat eqqartuussisoqarfimmit ataqatigiissarneqarlutillu akilerneqartarput. 

Arnaq Tasiilameersoq eqqartuussisoqarfiup aalajangernera Nunatta Eqqartuussisuuneqarfianut suliareqqitassanngortitsinissamik aalajangernissaminut ullunik 14-inik periarfissaqarpoq. 
 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat