Eqqartuussivik ukiortaamiit atorneqalissaaq

Nunatsinni eqqartuussisarnermik nutarterinermi "Kalaallit Nunaanni Eqqartuussivik ukiortaamiit atorneqalissaaq - suliassanik pisariusunik siullertut suliarinniffiusartussaq taamaalilluni atorneqalissaluni.
Allattoq Elisa Isaksen
decembarip 04-at 2009 05:14

Eqqartuussivimmi suliassat ingerlateqqitassanngortinneqarsimasut tamarmik Kalaallit Nunaanni ukiortaamiit aalajangiiffigineqartalissapput. Landsretti siullertut suliaqarsimagaangat Østre Landsret manna tikillugu ingerlatitseqqiffigineqartaraluarpoq.

Suliassat allat allannguiffigineqassanngillat - taakku eqqartuussivinni suliarineqartuartassapput, Landsrettimut ingerlateqqinneqarsinnaallutik. Sermitsiami tamanna allaaserineqarpoq.

Suliassat kalaallit eqqartuussiveqarfittaavanni aalajangiiffigineqarsimasut Højesterettimut ingerlateqqinneqarsinnaajuassapput.

Imaappoq suliassat Landsrettimit ullumikkut tigummineqartut ilaat Kalaallit Nunaanni Eqqartuussiviup tigussavai, tigusiartuaarnerlu ilutigalugu Landsrettimi inatsisilerituut ikiliartuaartinneqassapput. Qulingiluanik inatsisileritooqarsimagaluarpoq, taakkuli pingasuinnarnut ikilisinneqassapput.

Kalaallit Nunaanni Eqqartuussivik inatsisilerituutut ilinniarsimasunik eqqartuussisoqalissaaq, Thomas Trier Hansen pisortaralugu sulisussanik.