Eqqartuussiviit qullersaat aalajangerpoq atornerluisimasoq Herstedvesterimiissasoq

Angutip pineqaatissinneqartup ulorianarpallaarnera pissutigalugu taanna maani Nunatsinni pinerlussimasut inissiisarfianiissinnaanngitsoq, Eqqartuussiviit Qullersaannit naqissuserneqarpoq.

Meeqqanik marlunnik pinngitsaaliilluni arnerisimasutut sioorasaarisimasutullu pisuutinneqarluni angut eqqartuunneqarpoq.

Nutaarsiassaqartitsivik Ritzau malillugu, angutip piumasarisimagaluarpaa kissaatigalugu maani Nunatsinni pinerlussimasut inissiisarfianni killimimmik pineqaatissinneqarnissani, Danmarkimili Naalagaaffiup unnerluussisuata innersuussinera malillugu pineqaatissiineq allanngortinneqarluni.

Taamaalilluni angut pineqaatissinneqarpoq, Danmarkimi parnaarussivimmi Herstedvesterimi killiligaanngitsumik parnaarusimaneqartussatut.

Angut Nunatsinni pinerlussimasut inissiisarfiini inissinneqarsinnaanngitsoq, taassuma avatangiisiminut ulorianarpallaarnera pissutigalugu, Eqqartussiviit Qullersaanni eqqartuussisut tallimaasut isumaqarput.

Nutaarsiassaqartitsivik Ritzau malillugu, eqqartuussisut pineqaatissiinerminni tunngavilersuutigaat, angutip tarnip pissusaanik ilisimasalinnit katsorsarneqarsinnaanera Danmarkimi periarfissaqarnerummat aamma tissarnaveeqqutinik nakorsaatitortinneqarnissaa pineqaatissiinermi tunngavilersuutaammata.

Aamma tunngavilersuutinut ilaavoq, parnaarussivimmit Herstedvesterimit imaaliallaannaq angut anisinnaanngimat.

Angutip meeqqanut piliarisimasani peqqarniitsut artorsaatigerpasinngikkai, nakorsap naliliinerani allassimapput, nakorsarlu naliliivoq, angut anisinneqaruni pinerloqqissinnaakutsoortoq.

Angut pineqaatissinneqartoq eqqunngitsumik nakorsanit nalilerneqartoq, angutip illersuisua, Wilhelm Malling Ritzau malillugu oqarsimaneragaavoq. Angutip taama nalilerneqarnera, nakorsat kalaallisut oqaluttuunnginerisa kingunerigaa aamma paatsooqatigiittoqarsimasoq, Wilhelm Malling isumaqarnerarpoq.

Danmarkimi parnaarussivimmut, Herstedvesterimut kalaallit pinerlussimasut inissinneqartarneri, inuit pisinnaatitaaffiinik unioqqutitsinerusartoq isornartorsiorneqartarpoq.

Nunatsinni inissiisarfissaq matoqqasoq, ukiut tallimat qaangiuppata aatsaat piareerluni atorneqarlersussaasoq ilimagineqarpoq.