Immikkut piffissaligaanngitsumik pinerluuteqarsimasunut Herstedvesterimi isertitsivimmiittussanngorlugu pillagaasup 60-inik ukiullip Ole Møllerip misiligutaasumik iperagaanissaa Eqqartuussiviit Qullersaanni nalilerneqartariaqartoq, suliami unnerluussisuutitaasoq piumasaqarpoq.
Suliakkiissutigineqartulli Eqqartuussiviit Qullersaannut anngunnissaa qularineqarpoq.
Ippassaq politimestereqarfiup, Landsretip Ole Møllerimik eqqartuussinerata inernera Eqqartuussiviit Qullersaannut suliassanngortippaa.
Taamaasilluni kredsretip Landsretillu aalajangiineri unnerluussisup isumaqatiginngilai. Taamaattorli suliap Eqqartuussiviit Qullersaannut anngunnissaa qulakkeerneqanngilaq. Naalagaaffiup eqqartuussissuserisuata Landsretimi eqqartuussisoq akuersiteqqaartussaavaa. Oqaaseqarfigereerpagu suliap ingerlateqqinnissaanut ataatsimiititalip aalajangissavaa Eqqartuussiviit Qullersaannut suliassanngortinnissaa akuerisinnaanerlugu. Qaqutigoorpormi suliassat nunatsinneersut Eqqartuussiviit Qullersaannut anngunneqartarneri. Suliassammi tunngaviusumik aalajangikkat kisiisa suliarissanerlugit Eqqartuussiviit Qullersaat nalileeqqaartarpoq. Eqqumiigissavaralu suliaq Eqqartuussiviit Qullersaataa suliariniarlugu aalajangiuppagu; inatsisilerinermik siunnersorti Leif Senholt, nunatsinni pinerluttaalisitsineq pillugu atuakkiorsimasoq oqarpoq. Leif Senholtip suliaq tusagassiutit aqqutigalugit taamaallaat ilisimasaqarfigigaluarlugu, suliap tunngaviusumik pingaarutaa takujuminaatsippaa:
Paasinninnera tunngavigalugu Landsretip eqqartuunneqartoq misiligummik iperagassanngortippaa, malugeqqullugulu akisussaassuseqartumik suliaq ingerlanneqassasoq. Misiligummik anisinneqarnissaata tungaanut qaammatit arlallit piareersaasoqaqqaassaaq. Tamakku tunngavilersuutigineqarpata tupigissavara suliaq pingajussaa – tassalu Eqqartuussiviit Qullersaannut - suliassanngortinneqassappat.
Politimestereqarfimmi politifuldmægtigip Søren Jægerip Landsretip aalajangiinera isumaqatiginngilaa, isumaqarlunilu Eqqartuussiviit Qullersaannut suliassanngortittariaqartoq.
Politifuldmægtig Søren Jægerip ilisimatitsissutigaa Landsretip suliamik kinguartitsisinnaanera Højesteretip kisimi aalajangersinnaagaa; taamaasillunilu Ole Møllerip inuiaqatigiinnut danskinut akuunerulernissaata piareersarneqarnera Herstedvesterimi ingerlatiinnarneqassasoq.