Eqqartuussiviit politiillu oqarasuaatikkut sms-ikkullu nalunaaruteqartalissasut

Siunissami oqarasuaatikkut sms-ikkullu eqqartuussivimmut aggersasoqartalissaaq. Taamatut aaqqissuussisoqarneratigut eqqartuussinernik kinguartitsisoqartarneranut ikilisaataaniartussaassaaq.
decembarip 07-at 2016 11:30
Nutserisoq Simon Uldum -

Eqqartuussivimmi suliamut akuusut aappaagu maajip aallaqqaataanit atuutilersumik, assersuutigalugu eqqartuussutip inerneranik oqarasuaatikkut nalunaarfigineqartalissapput.

Nunatsinni pinerluttulerinermi inatsimmut allannguutissatut siunnersuut, Folketingimi maannakkorpiaq suliarineqartoq, ilaatigut taama imaqarpoq. Siunnersuut taanna Inatsisartuni amerlanerussuteqartut siornatigut akuersissutigereerpaat.

Taamatullu allannguuteqartitsisoqarneratigut Nunatsinni eqqartuussivinni sulisut, politiit imaluunniit sassaqqusissutinik tunniussisussatut toqqarneqarsimasut eqqartuussivimmit nalunaarutit allakkatigut nassiunnagit oqarasuaatikkut nalunaarutigisinnaanngussavaat.

Folketingimi partiit arlallit naapertorlugit tamanna Kalaallit Nunaanni qangali atuutilersinneqarsimasariaqaraluarpoq.

- Inoqarfiit imminnut qanoq ungasitsigineri silamullu tunngatillugu pissutsit eqqarsaatigalugit, malittarisassat Danmarkimi atuuttut Kalaallit Nunaanni atuutilersinneqarnissaat tulluartuussaaq, danskit inatsisinik atortitsinermut minsterertaavat, Søren Pape Poulsen, inatsisissatut siunnersuutip Folketingimi siullermeerneqarnerani taama oqarpoq.

Kinguartitsinerit ikilinissaat neriuutigineqartoq

Taamatut aaqqissuussineq Danmarkimi 2012-imi atuutilersinneqarpoq maannalu Nunatsinni atuuttussanngortinneqassalluni, ilaatigut Nunatta Eqqartuussisuuneqarfia Nunatsinnilu Politimesteri taama kaammattuuteqarput.

Eqqartuussivimmut aggersarneqartut takkutinngitsoorneri pissutigalugit eqqartuussinissanik kinguartitsisariaqartarnerit ikilisarnissaannut tamanna iluaqutaaniartussaassaaq.

Aaqqissuussinerulli ukiuni sisamani atuutereernerani sms-ikkut oqarasuaatikkullu nalunaaruteqartarnerit Danmarkimi eqqartuussinissanik kinguartitsinernut ikilisaataasimaneranut danskit inatsisinik atortitsinermut ministereqarfiat kisitsisitigut paasissutissaateqanngilaq.  

Nunatta Eqqartuussisuuneqarfiata tusarniaanermi akissutaani allassimavoq 'oqarasuaatikkut nalunaaruteqartarnerit eqqartuussivinnut iluaqutissartaat annikitsuaraasussatut naatsorsuutigineqarpoq’.

Taamaakkaluartoq Danmarkimi Eqqartuussivinnut aqutsisoqarfiup neriuutigaa nalunaarutit amerlanerusut Nunatsinni eqqartuussiviit apuussinnaasassagaat, pingaartumik nunaqarfinnut. Danskit naalakkersuisui aamma taamatut neriuuteqarput.

- Nalunaaruteqartarnerup pitsaanerulersinneqarnissaa danskit naalakkersuisuisa naatsorsuutigaat, taamaaliornikkut eqqartuussinernik kinguartitsinerit amerlassusaat ikilisinneqarniassammata, danskit inatsisinik atortitsinermut ministeriat Søren Pape Poulsen taama oqarpoq.

Paasiuminartuunissaa oqartussat akisussaaffigissavaat

Eqqartuussiviit nalunaarut oqarasuaatikkut tunniunneqassanersoq imaluunniit allakkatigut tunniunneqassanersoq suliamit suliamut naliliiffigisassavaat.

Nalunaarutilli tamaasa - oqarasuaatikkut tunniunneqarsimagaluarpataluunniit - aamma allakkatigut nassiunneqartassapput.

Tamatumunnga peqatigitillugu eqqartuussiviit politiillu nalunaarutit paasiuminartuunissaat akisussaaffigissavaat, oqaatsit sorliit atorneqarnersut apeqqutaatinnagu.

Nunatsinnilu eqqartuussiveqarnermi sulisut amerlanerussuteqartut danskisut oqaluttuuneri pissutigalugu tamanna ajornartorsiutitaqarsinnaavoq, Nunatsinnilu sumiiffinni arlalinni kommunefogedinik aamma amigaateqartoqarluni.

- Inuit Ataqatigiinnit eqqaasitsissutigissavarput kommunefogedit 13-it suli amigaatigineqarmata, tamannalu Kalaallit Nunaanni Politiit Inatsisinik atortitsinermut ministereqarfik ikiorsiullugu piaarnerpaamik aaqqiissuteqarfigisariaqarpaa, inatsimmut allannguutissatut siunnersuutip Folketingimi siullermeerneqarnerani Inuit Ataqatigiinneersoq Aaja Chemnitz Larsen taama oqarpoq.