Eqqartuussiviit ajalusuungajassaapput

Nunatsinni eqqartuussiviit suliassaat 8.000-inik amerlassusillit suliarineqapallannissaannik, folketingimi ilaasortamit, Johan Lund Olsenimit aamma Ilaqutariinnermut Inatsiseqarnermullu Naalakkersuisumit, Martha Lund Olsenimit Qallunaat naalakkersuisui nukigisaarneqarsimapput.

 

Eqqartuussivinni suliassat ikilinissat pillugit immikkut ittumik aningaasaliisoqarsimasoq, Qallunaat aningaasaqarnermut ministeriata, Bjarne Corydon-ip folketingimut ilaasortaq, Johan Lund Olsen allakkatigut nalunaarfigaa.

 

Immikkut aningaasaliissutit atorlugit, Qallunaat eqqartuussiviini sulisunik arlalinnik atorfinitsitsisoqassaaq. Nunatsinni eqqartuussivinni suliassat ilaat, Qallunaat eqqartuussiviini inatsisilerituut ulluinnarni suliarisartakkaminnut assigusut suliarisassavaat. Taamanna pissuteqarpoq Qallunaat eqqartuussivinni sulisut Nunatsinni pissutsinut kalaallillu oqaasinut ilisimasakinneri pissutigalugit, Corydonip Johan Lund Olsenimut allagaani ilaatigut tamanna atuarneqarsinnaavoq.

 

Nunatsinni eqqartuussivinni suliassat amerlasisimasut ikilisarneqarnissaannut pissutaaneruvoq, suliassat allat tullinnguukkumaartut pilertornerusumik suliarineqartalernissaat anguniarlugu.

 

Aningaasat immikkut aappaagu atugassanngortinneqartussat 5 million koruuniupput, 2015-imut 8 million koruunit illuartinneqarlutik 2016-imullu aningaasat 7 million koruunit illuartinneqarlutik.

 

Aningaasat taama amerlatigisut illuartinneqarneri Johan Lund Olsenip nuannaarutigaa.

 

- En oorinnguamilluunniit aningaasanut inatsimmit tapiisoqarnissaanik ilasunngikkaluarpunga, tassami aningaasaqarnermut ministerip oktobarip aappaanni allaffigaanga Nunatsinni eqqartuussivinni suliassat ikilisarnissaannut aningaasanik tapiisinnaanani, Inuit Ataqatigiit folketingimi ilaasortaa, Johan Lund Olsen tusagassiutinut anlunaarummini ullumi allappoq.