Eqqartuussiveqarnerup aaqqissuussaanera nutarterneqassaaq

Eqqartuussisoqarnerup aaqqissoqqinnerani anguniakkat ilagaat Kalaallit Nunaani parnaarussassanngortinneqartut Københavnip eqqaani Herstedvesterimut inissinnagit Nuummi parnaarussivimmut matoqqasumut inissinneqartalernissaat.

Herstedvesteri sivisussusaa killilerneqanngitsumik parnaarussassanngortinneqartunut manna tikillugu atorneqartarpoq. Kalaallit Nunaannili eqqartuussiveqarnerup aaqqissuuteqqinnerani parnaarussassanngortinneqartut - taakkununnga tarnikkut nappaateqartut ilanngullugit - sivisussusaa killileriikkamik isertitsivimmiisinneqartussanngorlugit pineqaatissittarnerat atorneqarnerulersinniarneqarpoq.

Taassuma saniatigut pineqaatissinneqartut tamarmik katsorsarneqarnissamik neqeroorfigineqartarnissaat anguniarneqarpoq.

Tunumi matoqqasunik tallimanik ammanerusunillu aamma tallimanik inissalimmik isertitsiviliortoqarnissaa pilersaarutinut ilaavoq.

Inatsisissatut siunnersuutigineqartumi aamma siunniunneqarpoq nutaamik inatsisitigut eqqartuussisinnaanerup aallartinneqarnissaa – taallugu; Kalaallit Nunaanni Eqqartuussivik. Tassanngaanniit suliassat inatsisitigut pisariusut sinerissamilu eqqartuussisutut ilinniartitaaneq taakkualu siunnersornissaat isumagineqartassaaq.

Ulloq manna tikillugu atorneqartoq; Nunatta Eqqartuussivia suliassanngorteqqinneqartunik taamaallaat suliaqartalissaaq, Østre Landsretilu Kalaallit Nunaanni Eqqartuussiveqarnermut atajunnaassalluni.

Aaqqissueqqinnerup kingunerisa ilagissaavaat ullumi atuuttoq Nunatta Eqqartuussivia siunnersuisoqarfeqalissasoq, tassani suliassat siulliit ilagissallugu eqqartuussiviit ullumi 18-iusut, Kommunet aaqqissornerisa nutarterneqarnerat aallaavigalugu eqqartuusiviit ikilisarneqasssanersut aalajangersarnissaat.

Eqqartuussiveqarnerup nutarteriffigineqarnissaanik siunnersuut Kalaallit Nunaanni Eqqartuussiveqarneq pillugu atatsimiititaliarsuup, 1994-imi pilersinneqartup Danmarkimi Inatsiseqarneq pillugu ministereqarfiup Namminersornerullutillu Oqartussat suleqatigiillutik saqqummiussaraat.

Aaqqissueqqiinermi eqqartuussiveqarnermut tunngasut ullumikkut pissutsinut tulluarsarniarneqarput, Danmarkimi pissutsinut assiigusunngorlugit. Taamaakkaluartoq Kalaallit Nunaanni pissutsit eqqarsaatigineqarput, soorlu nunatsinni eqqartuussisoqarnerup aaqqissuussaanerata atatiinnarnissaa patajaallisarneqarnissaalu anguniarneqarlutik.

Kredsdommerit – Kalaallit Nunaanni eqqartuussisut ilinniartinneqarsinnaalernissaat atorfinitsivinneqartarnissaallu anguniarneqarpoq. Eqqartuusseqataasartut – domsmænd – allatsit inatsisitigullu siunnersorneqarnerup patajaallisarneqarnissaa aamma anguniarneqarpoq.

Eqqartuussivinni oqaatsit eqqartuussaasunut paasinartuunissaat pingaatinneqarmat, kalaallit oqaasiisa atorneqartarnissaat aamma siunniunneqarpoq.