Eqqartuussiveqarnermi ukiuni 50-nngortuni aaqqitassat

Danmarkimi inatsisinik atortitsinermut ministeri Lene Espersen nunatsinnut tikeraarpoq. Lene Espersenip Inatsisinik atortitsinermut naalakkersuisoq Aleqa Hammond juunimi ataatsimeeqatigalugu neriorsuivoq eqqartussiveqarnermi atugassarititaasunut kiisalu isertitsivinnut utaqqisorpassuarnut aaqqissutissanut siunnersuutinik massakkut tikeraarnermini tunniussaqassalluni. Neriorsuutinili eqqortissimanngikkai Ilaqutariinnermut Inatsisinillu atortitsinermut naalakkersuisoq Aleqa Hammond uparuaavoq:

- Pineqaatissinneqarsimasut isertitsivinnut isertinneqartussat aqqusiniinnarmi angalasut amerliartupiloortorujussuupput, tamanna akuersaarnanngilluinnarpoq, Aleqa Hammond oqarpoq, nangillunilu:

- Inuiaqatigiiusugut tamanna nammassinnaajunnaarparput. Massakkoqqinnaaq iliuuseqartariaqarpugut, isumaqarpungalu oqariartuut taanna paasigaa. Suliaq aqagu aallartittariaqartoq piumasaqaatigaarput, qangassaarsuarlili inerisaaneq nunatsinni aallartereersimasussaagaluarpoq, nunatsinni eqqartuussiveqarnermik inatsisinillu atortitsinermut pissutsit atugassarititaasut minnerpaamik ukiuni 20-ni ataasiarlutiluunniit inerisarneqarsimanngillat, Aleqa Hammond oqarpoq.

Folketingip inatsisinik atortitsinermut ataatimiititaliaaneersoq Anne Baastrup tikeraaqataavoq. Nunatsinni eqqartuussiveqarnermi atukkanik pitsanngorsaanissaq siunertaralugu ataatsimiititaliortoqarnissaanik Aleqa Hammond siunnersuuteqarpoq, ataatsimiititaliaq eqqartuussiveqarfimmi sulisunik politeeqarfimmit assigisaannillu inuttalersorneqassasoq siunnersuutigineqarluni.