Eqqartuussiveqarneq pillugu ataatsimeersuarneq ammarpoq

Eqqartuussiveqarneq pillugu ataatsimiititaliarsuaq ukiut qulit sinnerlugit maanna sulereerpoq, iliuuseqarnissarlu tullinnguuttariaqalerpoq. Inatsisinut Atortitsinermut Naalakkersuisoq Tommy Marø, Eqqartuussiveqarneq pillugu ataatsimeersuarnerit pingajussaat, kulturikkut illorsuarmi Katuami ullumi aqagulu ingerlanneqartussaq ammarlugu ullumi taama oqarpoq. Tommy Marøp taama oqariartuuteqarnini ima tunngavilersorpaa:

-Nunatsinni eqqartuusseriaaseq annertuumik sammineqartussaavoq, taassuma saniatigut parnaarussiiveqarneq politeeqarneq nunaqarfinnilu kommunefoged-qarneq, pinerlussimasunik pinerluffigitissimasunik sullissineq, inatsisillu nutarterneqarnissaat sammineqassapput.

Pitsanngoriaatit siulliit qaqugu takussutissartaqalernissaat pillugu Marø ima oqarpoq:

- Pisangarpoq nunatsinni matoqqasumik parnaarussiveqalernissaa pillugu Folketingip isummernissaa. Ukiaru Inatsisartuni aappassaannerneqassaaq, tassanilu Inatsisartut Naalakkersuisullu kissaataat Folketingimut ingerlateqqinneqassapput. Piffissaq sivisooq atorlugu suliaq ingerlareermat neriuppunga isumaliutissiissutissami piffissaq tulleq taama sivisutigissanngitsoq.

Eqqartussiveqarneq pillugu oqillinneq ukiut qulit sinnerlugit ingerlanneqareermat Tommy Marøp neriuutiginerarpaa timitaaliinissaq tullinnguukkumaartoq. Eqqartuussiverneq pillugu ataatsimeersuarnermi inernerusut ukiaru Inatsisartunut sakkussatut aamma atussagini Tommy Marø oqarpoq.

Eqqartuussiveqarnerup nunatsinnit qaqugorpiaq tiguneqarnissaa Tommy Marøp erseqqarissumik oqaatigisinnaanngilaa, oqarlunili ukiut qulit utaqqisoqaqqinnginnissaa sulissutigissagini.