Eqqartuussiveqarneq danskit naalagaaffiata isumannaartariaqarpaa

Nunatsinni eqqartuussiveqarnerup aaqqissuuteqqinnerani immikkoortut tamarmik ilaatinneqarnissaat danskit naalagaaffiata isumannaartariaqarpaa. Pineqaatissinneqarsimasut inissiisarfianniittussatut utaqqisut ikilisarneqartariaqarput, eqqartuussisut sinerissamiittut pitsaanerusumik ilinniartinneqartariaqarput kiisalu politiit amerlisariaqarlutik. Naatsumik oqaatigalugu nunatsinni eqqartuussiveqarneq sutigut tamatigut pitsanngorsaaffigineqassaaq. Eqqartuussiveqarneq tamakkerluni aaqqissuussiffivigineqasaguni 200 million koruunit missaanni naleqassaaq. Danskit inatsisinik atortitsinermut ministeriata Lene Espersenip siusinnerusukkut isumaliuutissiissutit tulleriiaarlugit pingaarnersiorlugillu aaqqiisoqarnissaa nalunaarutiginikuuvaa.

- Sukkanerusumik aaqqiisoqartariaqarpoq eqqartuussiveqarnermilu immikkoortut tamarmik pingaaruteqarput. Ataatsimiititaliarsuup ukiut marluk matuma siorna isumaliuutissiissutini tunniummagilli Kalaallit Nunaanni eqqartuussiveqarnerup iluani pitsannguallaataasinnaasunik takusaqarnikuunngilanga, højesteretimi eqqartuusisoq Per Walsøe eqqartuussiveqarneq pillugu ataatsimiititaliarsuarmi siulittaasuusimasoq oqarpoq nangipporlu: - Kalaallit nunaanni naalakkersuisut eqqartuussiveqarnerlu pillugu ataatsimiititaliarsuup isumaliuutissiissutai Folketingimi ilaasortanit akuersissutigineqarnissaat taamattumik neriuutigaara, Per Walsøe oqarpoq nangillunilu:- Massakkutut atugassarititaasut allanngussanngikkaluarput. Folketingip inatsisinullu atortitsinermut ministerip siusinnerusukkut ikiuunneratigut eqqartuussisut illersuisullu pikkorissartinneqarnikuummata neriuppunga tamatumuuna aamma ikiuukkusussuseqarlutik akuersiumaartut.