Eqqartuussiveqarfik naleqqussartariaqarsoraa

Kalaallit Nunaanni eqqartuussiveqarfik ullutsinnut naleqqussartariaqarpoq. Ministeriuneq Anders Fogh Rasmussen, Ministeriaqarfimmi tusagassiortunik ullumi katersuutsitsisoqarnerani Kalaallit Nunaanni eqqartuussiveqarneq aamma pinerluuteqarsimasut pillugit inatsisissatut siunnersuutit saqqummiunnerini oqarpoq.

Inatsisissat nutarterinermik kinguneqartussat tallimanngorpat decembarip ulluisa 14-ianni Folketingip oqaluttarfiani saqqummiunneqassapput siullermeerneqassallutik.

- Inatsisissat saqqummiunneqartut kingunerissavaat 1950-ikkut ingerlanerannili aatsaat taama annertutigisumik Kalaallit Nunaanni eqqartuussiveqarnerup nutarterneqarnissaa, Anders Fogh Rasmussen inatsisissatut siunnersuutit pillugit ullaap tungaa oqarpoq.

Ilaatigut siunnersuutigineqarpoq sumiiffinni ataasiakkaani eqqartuussiveqarnerup atuutsiinnarneqarnissaa, eqqartuussisulli tunngaviusunik ilinniartinneqartassapput.

Eqqartuussiveqarfiup nutarterneqarnissaanut inatsisip siunnersuutigaattaaq eqqartuussisoqartillugu pappiaqqat tunngaviusut pingaarutillit kalaallisut nutserneqartarnissaat.

Aamma pinerluuteqarsimasutut eqqartuussisoqarnerani illersuisoqartarneq pitsanngorsaavigineqassaaq.

Kiisalu pillaatisinermi pineqaatissiisarnerup aalajangersimanerusumik ingerlanneqartalernissaa siunnersuutigineqarpoq.

Inuiaqatigiinni sullissinermiit matoqqasumut inissiisarfimmiinnissamut, pinerlussimanerup sakkortussusaa apeqqutaalluni, aalajangersimasumik pineqartissiissutigineqartalernissaat siunnersuutigineqarputtaaq.