Eqqartuussisuuneqarfik misissuilerpoq

-Taamatut pineqaatissiisarneq tamakkissumik paasisaqarfigerusupparput, Nunap Eqqartuussisuunera Søren Søndergaard Hansen oqarpoq.

Inuiaqatigiinni sulisitaanissamut pineqaatissinneqarsimasut amerlassusii misissuiffigineqalerput.

-Taamatut pineqaatissiissarneq tamakkiisumik paasisaqarfigerusupparput, Nunap Eqqartuussisuunera Søren Søndergaard Hansen KNRimut oqarpoq.

Kalaallit Nunaata Eqqartuussisuuneqarfianit, politiinit, pinerluttunillu isumaginnittoqarfimmit aamma Inuussutissarsiornermut Naalakkersuisoqarfimmit misissuilerput. Aammali pinerluuteqarsimasut inuiaqatigiinnut sulisitaanissamut pineqaatissinneqarnissaminnut naleqquttutut innersuunneqarsimagaluartut  allaanerusumilli pineqaatissinneqarsimasut amerlassusii misissuataarneqassapput.

Paasisallu taakku tunngavigalugit, pinerluuteqarsimasoq imaluunniit suliani suni inuiaqatigiinnut sulisitaanissaq naleqquttuunersoq oqallisigineqarluni misissorneqassaaq.

Eqqartuussiveqarfinni inuiaqatigiinnut sulisitaanissamut pineqaatissiisinnaaneq 2010mi atuutilerpoq, maannamullu pinerluuteqarsimasut 26t taamatut pineqaatissinneqarsimasut, justitsiministeri Morten Bødskov Folketingemi Kalaallit Nunaat pillugu ataatsimiitsitaliamut ukiup aallatilaarnerani ilisimatitsivoq. Kalaallit Nunaannilu suliffiit 64it inuiaqatigiinni sulisitaasunut suliffiusinnaasut aamma ilisimatitsissutigineqarpoq, pineqaatisinneqarsimasullu ataatsikkut 100t sulisitaasinnaasut.

Inuiaqatigiinni sulisitaasimasut aamma misissuinermi apersorneqassapput.

-Paaserusupparput taakkua qanoq ingerlasimanersut, Nunap Eqqartuussisuunera Søren Søndergaard Hansen oqarpoq. Misissuineq oktoberimi naammassineqassaaq. Inernerillu eqqartuussivinni suliani inuiaqatigiinnut sulisitaanissamik kinguneqaratarsinnaasuni najoqqutarineqarsinnaassapput. Aammali pisortat misissuinerup inernerinik atuisinnaassallutik.

-Politikkerit paasisanik tunngaveqarlutik oqallissinnaalissapput, soorlu pinerluuteqarsimasut inuiaqatigiinni sulisitaanissamut pineqaatissinneqarsimasut ikippallaarnersut oqallisigisinnaalissavaat, Nunap Eqqartuussisuunera Søren Søndergaard Hansen oqarpoq.