Eqqartuussisut maanna nalilersueriaannanngorput
Unnerluussisoq Morten Nielsen siulliulluni suliamut saqqummiussivoq. Unnerluussisup aallarniutigalugu piumasaqaatigaa, Jens Napãtôk' qaammatini sisamani pinerluuteqarsimasut inissinneqartarfianiittussanngorlugu pineqaatissinneqassasoq, tassa pinerluttulerinermik inatsit unioqqutillugu, akileraartartut aningaasaataannik, 128.366 koruuninik ilassinnissutitut atornerluisimasutut pasillugu.
- Ilassinninneq qanoq iluseqassanersoq inatsisitigut allassimanngilaq, Morten Nielsen oqarpoq. Ilassinninnernullu malittarisassat ersarinnginnerat Jens Napãtôp atornerlussanngikkai Morten Nielsenip saqqummiinermini oqaatigaa.
Ilassinissutinut kaajallaasitaq 1993-meersoq ersarissunik malittarisassaqanngikkaluartoq, killeqartitsivoq, tassami immikkut ittuniinnaq Namminersornerllutik Oqartussallu soqutigisaasa iluani pisoqarpat ilassinnittoqarsinnaavoq.
- Pasineqartup killerititaq qaangerujussuarpaa, pisuutinneqanngikkunilu killeqanngitsumik atuinissamut ammaassinerussaaq, unnerluussisoq Morten Nielsen oqarpoq.
Illersuisorli Phillip Comerford allaanerulluinnartumik suliamut isumaqarpoq.
- Eqqartuussivimmi suliap ingerlanneqarnerani malittarisassat qanoq ittuuneri iluatsittumik nassuiarneqanngillat, Illersuisoq Phillip Comerford oqarpoq.
Jens Napãtôk' inuit akornanni piisaarsimasutut nalilerneqareeraluarpalluunniit Eqqartuussivimmi pineqaatissinneqarsinnaannginnerarpaa.
- Pisussaaffimmik atornerluilluni iliuuseqarsimasutut unnerluutigineqarpoq, taamannallu Jens Napãtôk' nalilerneqarsinnaanngilaq, siunertarisimanngilaami atornerluinissani, qasseeriarlunimi Namminersornerullutik oqartussat iluani sulisunut apeqqutigisarsimavaa eqqortuliornerluni, illersuisoq Phillip Comerford saqqummiussinermini tunngavilersuivoq.
Jens Napãtôk' saqqummiussisoqareermat ima akivoq.
- tassa taanna uanga nalilissanngilara aamma nalilertussaanngilara, eqqartuussivik oqaluttussaavoq, taanna qilanaarivara aamma ataqqissavara.
Nunatta eqqartuussisuunerata Søren Søndergård Hansenip ataasinngorpat ullup qeqqanut suliamut tunngatillugu pineqaatissiisoqassanersoq nalunaarutigissavaa.
