Eqqartuussisut inatsisitigut isumannaatsuunissaq ernummatigaat

2009-mi eqqartuussiviit qullersaanni aalajangikkami naqissuserneqarpoq, kalaallit marluinnik oqaasillit, imminerminnut unnerluutiginninnerit kalaallisuunngortinneqarnissaannik piumasaqaateqarsinnaanngitsut, oqaluttaaffigineqarlunilu nutserunneqarnissaq naammattoq.

Naak politiit piumaffigineqartillutik kalaallisuunngortitsisaraluartut, taamatut aalajangerneq eqqartuussisut peqatigiiffianni siulittaasumit Myrna Lyngemit uggorineqarpoq.

- Kalaallit Nunaanni qallunaatuullaqqissorpassuaqaraluartoq, kalaallisut qallunaatullu oqaatsit assigiinngitsorujussuummata, qallunaatut allassimasut isumaat paasisorigaluarlugit ilaatigut paatsoorneqarsinnaasarput, Myrna Lynge KNRimut oqarpoq.

Unnerluussaq ulluinnarni kalaallisut oqaluttuutillugu unnerluussutip kalaallisuunngortinneqanngitsoortarnera qaqutigoortoq Myrna Lyngep oqaatigaa. Tamannalu pigaangat eqqartuussinissamik kinguaattoornermik kinguneqartarpoq.

- Ilaatigut ima pisoqartarpoq unnerluussut kalaallisuunngortinneqarsimanngitsoq. Unnerluussat ilai unnerluussut paasineraannartarpaat, naak allannera tamaviat paasisimanngikkaluarlugu. Aatsaallu eqqartuussivimmi aallartereerluta iluamik paasisimanngikkaat paasisarlutigu. Taamaalilluni eqqartuussineq kinguartittariaqalersinnaasarpoq, Myrna Lynge nassuiaavoq.

Tamannalu inatsisitigut isumannaatsuunissamut ajornartorsiutaanerarpaa.

- Kultoorigut assigiinngitsuummata paasinneriaatsit assigiinngissinnnaapput. Aamma  eqqartuussinitsinni imaattoqarsinnaasarpoq unnerluussap eqqartuussut paatsoorlugu akuerisimagaa  eqqartuussivimmilu taamak pinerluuteqarsimanini akuersaarlugu, uffa immaqa allatut isikkoqaraluartoq. Taamaalilluni ajornerusumik eqqartuunneqarsinnaanissaq pisinnaavoq, Myrna Lynge oqarpoq.

Taamaattumik unnerluussutit tamarmik kalaallisuungortinneqartarnissaat pissusissamisoortutut unnerluussisussaatitaasunit isumagineqartariaqaraluartoq, taanna isumaqarpoq.