Eqqartuussisunik suliunnaareersimagaluartunik atorfinitsitseqqinninneq

Illoqarfinni ataasiakkaani eqqartuussisunik suliunnaareersimagaluartunik atorfinitsitseqqinnikkut aamma maanna eqqartuussisuusut ilinniarteqqinnerisigut suliassaq qalleraatiinnealersut ikileriarneqassallutik, Ilaqutariinermut Inatsiseqarnermullu Naalakkersuisoq, Martha Lund Olsen oqaluttuarpoq.

- Suliassat ikilisarneqassapput qanga eqqartuussisuusimasut atorfinitsinneqaqqinnerini aamma ilinniartitseqqinnissaq eqqartuussisussanik nutaanik pilersaarutaavoq, Martha Lund Olsen oqarpoq.

Suliassat 8000-it missaaniitut annersaraat inunnut ataasiakkaanut tunngasut, pinerlunnermut tunngassuteqanngitsut. Inatsiseqarnermut naalakkersuisoq naapertorlugu taakkua Nunatta Eqqartuussiviani suliarineqartalissapput, Qallunaat Nunaanniit sulisussanik tikisitsisarnertigut.

Taassuma aamma oqaatigaa eqqartuusisoqarnermi aaqqissuuseqqinneq, januarip aallaqqataani 2010-imi aallartinneqartoq iluatsissimanngitsoq nassuerutigisariaqaripput, tassami aaqqissuusseqqinnerup kinguneranik eqqartuussisut sisamat akornanni aqqaneq marluusut suliunnaarsinneqarnerisa kingunerisimammagu, taamaattumillu suliassat 8.000-it missaaniitut maanna pujoralannik katersiinnalersimallutik, tamannalu qaangerneqartariaqartoq, Martha Lund Olsenip oqaatigaa.

- Inuit ataasiakkaanut tunngasut suliassat Qallunaat Nunaannit sulisut suliarisassavaat, Kalaallit Nunaata Eqqartuusiviani, Martha Lund Olsen oqarpoq.

Eqqartuussivinni suliassat ikilisinneqarnissaat aamma pinerluttaaliuisitsilluni suliat qanoq isilluni pitsanngorsaaffigineqarsinnaaneri pillugit, inatsisinik atuutitsinermut ministeri, Morten Bødskov aamma Martha Lund Olsen, augustip arfineq aappaanni ataatsimeeqatigiipput. Tassanilu eqqartukkat Tasiilami nanginneqarneranni maanna tassa aaqqiissutissanik innersuusuteqartoqarluni.