Eqqartuussisulersuunnianngilaa
Greenpeacep sapaatip-akunnerani kingullermi iliuusai pillugit Cairn Energy eqqartuussivilersuussinissani pilersaarutiginngilaa, uuliasiortitseqatigiiffik KNR-imut akissummini ullumi taama allappoq.
Pinngortitamik illersuiniaqatigiiffiup suna pissutigalugu eqqartuussivilersuunneqannginnissaa Cairn Energyp erseqqinnerusumik nassuiaateqarfiginngilaa, taamaattorli oqarluni Qeqertarsuup eqqaani akerliuniarluni iliuuseqarneq ingerlatseqatigiiffiup tamaani qillerinissaanut piffissaliussatut pilersaarutaanik kinguartitsinavianngitsoq.
Cairn tamatigoortuujuaannarpoq, suliamigut aningaasaliinissanullu tunngasutigut, qillerinissatsinnut pilersaarutinut ilanngullugit suliarineqartartunik, maannalu qillerinerit aallarteqqinneqarmata unikkallarnitta aasaanerani qillerinissamut pilersaarutitsinnut sunniuteqarnissaa naatsorsuutiginngilarput, Cairn Energy KNR-imut erseqqissaavoq.
Greenpeacep akerliuniarnera sapaatip-akunnerani kingullermi marlunngormat aallartippoq, akerliuniat Greenpeacemeersut gummibådiminnik qillerivik Stenadon ornimmassuk qilleriviullu niuluusarsuatigut majuariarlutik saviminertaasa ilaannut naatillutik. Tuperni sungaartuni qillerivimmilu issakajaartuni unnuk ataaseq Stenadonimi unnuigallarput, nillernerali anorlerneralu pissutigalugit iliuuseqarnertik taamaatillugu. Politiinit tigusarineqarput tamarmillu sisamaallutik Kalaallit Nunaannit anisinneqarlutik nunaminnullu aallartitaallutik.
Greenpeace Cairn Energyp suliniaqatigiiffik eqqartuussivilersuutinngimmagu naammagisimaarinnilluarpoq. Silamut tunngasunik sulialik Jon Burghwald ima oqarpoq:
- Soorunami nuannaarutigaarput, isumaqarpungalu tamanna pissutsinik allanngortitsinavianngitsoq, aappaatigullu nammineq isumaqarpunga taakkua Cairn suliffeqarfittut pitsaanerulersinngikkaat.
Greenpeacelli taamaattoq eqqartuussivilersuunneqarnissi taarsiinissamillu piumasaqarfigineqarnissi piareersimaffigisimagaluarpaa, Jon Burchwaldillu oqarnera naapertorlugu aningaasanik immikkoortitsereersimagaluarluni.
Akerliuniat umiarsuaat Esperanza maanna kujammut ingerlaarpoq, Jon Burgwaldillu oqarnera naapertorlugu Kalaallit Nunaannit qimagukkiartorluni. Nittartagaq marinetraffic.com naapertorlugu Esperanza ualiartoq Paamiut qanittuaniippoq.
