Eqqartuussissutitaqanngitsumik isumaqatigiinneq Olsenip Inatsisartunut ilaasortanngunngitsoorutigaa
Inatsisartunut ilaasortaasinnaanngitsutut aalajangiiffigineqartup Nikku Olsenip politikkimik suliaqarnini aallartilaaginnarlugu politikeriujunnaarnerminut nassuiaateqarpoq.
Allattoq Peter Troelsen, Simon Uldum
apriilip 05-at 2013 14:22
Nikku Olsen 2005-imi inuttut ajornartorsiortupilussuunermi nalaani taamani arnaatigisani, nammineq oqarneratut, isassimavaa.
Kingorna suliaq eqqartuussissutitaqanngitsumik isumaqatigiinnermik kinguneqarpoq.
-Eqqartuussissulerisuma siunnersuineratigut eqqunngitsuliorfigisara taarsiissuteqarfigalugu akiliivunga. Tamanna 2008-mi pivoq, pisorlu taannarpiaq pissutigalugu Inatsisartunut ilaasortaanera annaavara. Pineqaatissinneqarnikuunngilanga, taamaammat eqqartuussissutitaqanngitsumik isumaqatigiissuteqarnikkut nassuernera pineqaatissinneqarnertut isigineqarsimagunarpoq, taamaalillungalu politikkikkut sulinissannut mattunneqarpunga, Nikku Olsen KNR-imut oqarpoq.
