Eqqartuussissuserisoq: Icesave iluanaarniutaassanngilaq

Islandimiut qarasaasiakkut aningaaseriviata, Icesave-ip, 2008-mi aningaasarsiornikkut ajalusoornerata kingorna, Tuluit Nunaannut Hollandimullu Islandip taartissai 30 milliardit koruuningajalluinnaat pillugit isumaqatigiinniarneq ilimagisamit ajunnginnerusumik inerneqarpoq.

Island sinnerlugu isumaqatigiinniartoq, eqqartuussissuserisoq, amerikamiu, Lee Buchheit, tusagassiortunik Reykjavikimi ippassaq unnukkut katersortitsinermi taama ilisimatitsivoq.

Isumaqatiginninniarnerit tamaviaarnartut pereersullu isumaqatigiinniarneq inissippoq, erniallu aallaqqaammut annertusimagaluaqisut annikinnerujussuit Islandip iluatsippai.

- Erniat 5,5 procentimiit 3 procentip missaanut appartinnissaat Tuluit Nunaata Hollandillu akuersaarpaat, kinaluunniit pisuussuteqanngimmat, kikkulluunniit aamma iluanaaruteqartariaqanngillat, Lee Bucheit nassuiaavoq.

Island 2016-imiit taarsersuilissaaq. Akiitsut ukiualunnguit qaangiuppata naammassineqarnissaat ilimagineqarpoq. Akiitsulli ukioq 2046 nallertinnagu akilerneqariissapput, taamali sivisutigisumik akilersuisoqarnissaa kialuunniit ilimaginngilaa.

Islandip EU-mut ilaasortanngorniarnissaa taamaalilluni maanna ilippanarnerulerpoq.