Eqqartuussissuserisoq: Aalajangerneq allanngortinneqarsinnaavoq
- Periarfissat ajunngitsutut nalilersinnaavakka Namminersorlutik Oqartussat suliaq juulli sioqqullugu nukingernartutut suliarisinnaasuuppassuk, eqqartuussissuserisoq Peter Breum oqarpoq.
Kattuffiit,SIK, AK, IMAK, PIP, PPK-lu, isumaqatigiisitsiniartarfimmut suliassanngortitsinerat periarfissaqarluartoq Peter Breum isumaqarpoq.
Juulli sioqqullugu akissarsisitsisarnerup atorunnaarsinneqarneranik nalunaarut apriilimi saqqummiunnagu kattuffinnik isumaqatigiinniartarnerni ilanngunneqartarsimasinnaagaluartoq Peter Breum oqarpoq.
- Akissarsiat pillugit isumaqatigiinniarnermi allannguutissatut piumasaqaatitut Namminersorlutik Oqartussat saqqummiussimasuuppassuk tamanna pissusissamisuussagaluarpoq, illuatungeriillu isumaqatigiissutiginngippassuk taanna tunuartissinnaallugu, imaluunniit isumaqatigiissutigineqartup ilaa tunuartillugu, Peter Breum oqarpoq.
- Uani pineqartoq tassaavoq, isumaqatigiinniarnermi ilanngunneqarsimanngitsoq, tamanna atorsinnaanngilaq, isumaqatigiissutigineqartumut tamakkiisumut kinguneqartitsisinnaasoq, Peter Breum oqarpoq.
Juulli sioqqullugu akissarsisitsisarnerup atorunnaarsinneqarnera Namminersorlutik Oqartussat aalajangiusimavaat, tamanna sulisartut kaffuffiannut upernaakkut nalunaarutigigamikku, Peter Breum sulisartut kattuffii sinnerlugit suliamik ingerlataqartoq oqarpoq.
Namminersorlutik Oqartussat ileqqunik atorunnaarsitsisinnaanerat sulisitsisut kattuffianni GA-mi inatsisilerituumit Karsten Klausenimi ilalerneqarpoq, taamatulli oqarneq isumaqatiginniartarfimmi eqqartuussissuserisup isumaqatiginngilaa.
- Isumaqatigiinniarnerni ileqqut malillugit isumaqatigiissutit atorunnaarsinneqarnissaannut, soorlu juulli kingorna akissarsiat tunniunneqarsinnaanerinut tunngasoq, piffissaq sioqqullugu nalunaarutigineqarsimappat tamanna pissusissamisoorpoq, kisianni uani pineqartoq ukiut arlaqartut isumaqatigiinniarnerni ilanngunneqartarsimanngimmat atorunnaarsitsineq pissusissamisuunngitsoq, Peter Breum isumaqarpoq.
Sulisut kattuffiisa Namminersorlutik Oqartussanut naammagittaalliutaat isumaqatiginniartarfimmi eqqartuussisup Namminersorlutik Oqartussanut tunniuppaa suliap piaartumik naammassineqarnissaa piumasarineqarluni.
Taassuma neriuutigaa Namminersorlutik Oqartussat piaartumik suliariumaaraat, pineqartoq qaangiuteereersoq jannuaarimi aalajangigassanngortinneqarpat suliassanngortitsisunut tassalu kattuffinnut taarsiissuteqarnissamik kinguneqarsinnaammat.
Namminersorlutik Oqartussani sulisut isumaqatiginniarnermilu immikkoortortami pisortaq Rasmus Sembach pineqartoq pillugu ullup qeqqata siorna oqaaseqartinniaraluarparput, tamannali iluatsissinnaasimanngilaq.
Kommuunit sisamat juulli sioqqullugu akissarsisitsinissartik aalajangiusimavaat, sulisartut kattuffiisa naatsorsugaat malillugit ilasortat quliugaangata taakkunannga arfinillit juulli sioqqullugu akissarsissapput, isumaqatiginniartarfimmut suliassanngortitsinerup inernera uani apeqqutaasussaasani.
Juulli sioqqullugu akissarsisitsisarnerup atorunnaarsinneqarneranut isumaqataanatik akerliusut atsiorneri 1500-uusut SIK-p siulittaasuata tulliata Josef Therkildsenip aningaasaqarnermut naalakkersuisumut Maliina Abelsenimut ullumi tuniuppai.