Eqqartuussisoqannginnissaa muslimit pakatsissutigaat

Jyllands-Postenip Muuamaap titartarneqarneranik saqqummiinera tunngavigalugu Muuamaamik upperisallit kattuffii aqqanillit eqqartuussivimmut tunniussisut Rigsadvokatip unnerluussisoqannginnissaanik ippassaq aalajangiinera pakatsissutigaat. Nunat tamalaat inuit pisinnaatitaaffii pillugit eqqartuussivimmut suliaq ingerlateqqissavarput, kattuffiit aqqanillit oqaaseqartartuat, Asmara Dol-Hamit nalunaaruteqarpoq.

- Kattuffimmi ilaasortagut arlallit nalunaaruteqarput suliaq ingerlateqqinneqartariaqartoq. Inatsisit malillugit akerliussutsimik takutitsisoqarsinnaasoq ilaasortatsinnit takutinniarneqarusuppoq, neriuutigaarpullu tamanna eqqartuussivitsigut aqqutissiuunneqarsinnaajumaartoq. Rigsadvokatip unnerluussisoqannginnissaanik aalajangernera tamatta tupaallaatigaarput, Asmara Dol-Hamit oqarpoq.

Asmara Dol-Hamit aperaarput rigsadvokatip aalajangernera nunani allani muuamaamik upperisallit qanoq qisuariarfigisimaneraat, imalu akivoq:

- Neriuppunga nunani allani upperisaqaqatigut eqqarsarluarlutik, oqaloqatiginninnissaminnik piumassuseqarumaartut kiisalu kusanartumik siunertaqarumaartut. Tamannarpiaq tunngavigalugu suliaq ingerlateqqipparput nunani allani upperisaqaqatigut paasitinniarlugillusooq suli periarfissaqarluta. Eqqornerpaamillu iliuuseqarniarutta eqqartuussiviit aqqutigalugit suliaq ingerlattariaqarlutigu. Taamannak suliap ingerlateqqinnianerani aamma siunertaraarput eqqissisaanissarput, Asmara Dol-Hamit naggasiivoq.