Eqqartuussisoq: Britta pillugu suliaq nanginneqassaaq
Britta Nielsenilli eqqartuussivilersuunneqarnissaata kinguartinneqarnissaa, eqqartuussisut siulittaasuata Vivi Sønderskov Møllerip itigartippaa.
- Eqqartuussivilersuussinerup kinguartinneqarnissaanut kissaat eqqartuussiviup eqqartorpaa, eqqartuussivimmulli sassartinneqartup aningaasanut peqquserluuteqarsimanermut atatillugu pasilliutit eqqartuussinermi ullormi siullermi akuerivai, Københavnip eqqartuussivia marlunngornermi taama ilisimatitsivoq.
Eqqartuussivimmullu sassartinneqartup nassuiaanissaa taamaasilluni periarfissaalerpoq.
AAMMA ATUARUK Britta Nielsenip aningaasanik nuussisarsimanini nassuerutigigaa
- Britta Nielsenip suliamut atatillugu nassuiaatissaa eqqartuussivimmi aallartinneqarnissaa eqqartuussiviup pissusissamisuuginnartutut nalilerpaa, Britta Nielsenip nassuiaatiginiakkani taamaasilluni nassuiaatigisinnaassavai, Vivi Sønderskov Møllerip oqaatigaa.
Britta Nielsenili ullumi marlunngornermi tamanna kissaatiginngikkaa, eqqartuussissuserisuata oqaatigaa.
- Suliap takussutissartai tamakkiisut piginnginnatsigit kinguartitsisoqartariaqarpoq, nassuiaateqarnissaalu kissaatiginngilara, Britta Nielsenip eqqartuussissuserisua Nima Nabipour oqarpoq.
Eqqartuussissuserisua Britta Nielsenip Sydafrikamiit Danmarkimut tunniunneqarnera pillugu suliap ingerlarnganut tunngasumik akissutisisimannginnerartuarsinnarsoraaq.
AAMMA ATUARUK Peqquserlussimasutut pasisaq Sydafrikami tigusarineqartoq
Britta Nielsenip pisortat aningaasaataannik peqquserlussimasutut unnerluutigineqartup Sydafrikami iperagaanissaa tamatumalu kingorna kajumissutsiminik Danmarkimi politiit peqatigalugit Købenvniliarnissaa pillugit tunniussinermut isumaqatigiissusiortoqarpoq. Tamannalu aamma pivoq, Danmarkimilu tigusaavoq.
Britta Nielsen unnerluutigineqarmat unnerluussisussaatitaasut aalajangerput Britta Nielsen pillugu suliamik paragraffi 88 tunngavigalugu ingerlatsissallutik.
Paragraffi 88 naapertorlugu sulianut annertuunut tunngatillugu pillaasarnermi killissarititaq 50 procentimik qaffanneqarsinnaavoq. Tassa imaappoq, suliami uani pineqartumi pillaasarnermi killissarititaq ukiut arfineq-pingasuniit ukiut aqqaneq-marlunnut sivitsorneqassaaq.
AAMMA ATUARUK Peqquserluttuliorsimasutut pasisaq Britta Nielsen tigummigallagassanngortinneqarpoq.
Tunniussinermut pisortatigoortumik isumaqatigiissusiortoqarsimagaluarpat tamanna Nima Nabipourip qanoq pinngitsoortissimatigisinnaaneraluaraa apeqqutaalluinnalerpoq.
Suliap kinguartinneqaqattaarsimanera pissutigalu apeqqut paragraffi 88-imut tunngasoq suliamik nangitsinerup aallartinnerani eqqartorneqaqqaassaaq.
