Eqqartuussinerup inernissaa pissanngatigineqaqaaq

Eqqartuussivimmi aalajangersaaqataasut, tassa nævninget, Danmarkimi nikasaalluni toqutsisimasutut unnerluussat qulingiluat eqqartuussaassanersut massakkorpiaq nalilerniarsaraat.

Arnap 18-iinnarnik ukiullip, Slagelsemi qimuttuitsut unittarfiata silatinnguani aallaallugu toqunneqartup, Ghazala Khanip, ilaqutai qulingiluat tamarmik toqutseqataasimasutut unnerluunneqassasut, eqqartuussisuunerup Michael Lerche-p ippassaq piumasaraa.

Arnap aqqaluaa aallaannittoq kisimi pinnani, ilaqutaasulli qulingiluat tamarmik, nikasaalluni toqutsinermik taaneqartartuni, Europap avannarpasissuata oqaluttuassartaani aatsaavissuaq taama pisoqassaaq, naak pisuni assingusinnaasuni taama pisoqarsimatillugu ilaqutaasut arlallit pisuutinneqarnissaat anguniarlugu siusinnerusukkut misiliisoqartarsimagaluartoq, paasisimasaqarluartut naliliipput.

Taamaammat eqqartuussinerup inernissaa pissanngatigineqaqaaq, aamma Europami.

Tamanna uagut nalunaaqutarput malillugu ullaaq arfineq-marlunut aalajangerneqartussaagaluarpoq, nalileqataasulli suli naammassisimanngimmata eqqartuussinerup inernera ullumi kingusinnerusukkut pissasoq eqqartuussivimmit aalajangerneqarpoq.