Eqqartuussinermut ullut 20-t atussangavaat

Puisit neqaannik pølsiliortussatut suliffeqarfiliaasimagaluartoq Puisi A/S pillugu suliassaq Nunatta Eqqartuussiviani nalunaaqutaq ataatsimut asallartissaaq.

´17.675.162, 45 kr.-it, taavalu taakkua erniaat. Aningaasat taama amerlatigisut eqqartuussivimmut sassartinneqartut akilertariaqalersinnaavaat, Namminersorlutik Oqartussat piumasaqaataat Nunatta Eqqartuussiviata atortussanngortippagit.

Ilumullu taamaassanersoq paasiniarlugu, Nunatta Eqqartuussivia decembarip qulingiluaat ilanngullugu piffissaliisimavoq - tassa ulluni 20-ni eqqartuussivimmiinnerit.

Suliat assigiinngitsutigut katitigaaqisut saqqummiunnerinnaanut ullut tallimat siulliit atorneqassapput.

Kikkummi Nunatta oqaluttuarisaanerani inuussutissarsiornermi kusaanatsuliat annersaasa ilaanni immaqalu tupinnarnersaanni unnerluussaappat?

Ukiut qulit qaqangiuttulli akiliisinnaajunnaartup Puisi A/S-ip siulersuisorisisarsimasaat taarserartut pineqarput, tassaasut: Lars-Emil Johansen, Adam Dahl, Ellen Egede Hansen, Henning Sloth Pedersen, Jess G. Berthelsen, Anders Brøns, Nikolaj Ludvigsen, Jørn Holding aamma Isak Vahl. Taakkua saniatigut suliffeqarfiup pisortarisimasaa, Hans Peder Barlach Christensen, kiisalu suliffeqarfiup kukkunersiuisui aamma unnerluunneqarput. Kinngulleq tassaavoq kukkunersiuisoq naalagaaffimmit akuerisaq Ole Hansen aamma ullumikkut Grønlands Revisionskontorimik ateqartoq.

Unnnerluunneqartut tamarmik pinngitsuunerarput, taakkunanngalu arlallit ukiut ingerlaneranni naammagittaalliortarsimapput, suliassap uuma eqqartuussivimmi suliarineqarnissaanut piffissaq sivisuallaarnerarlugu.

Namminersorlutik Oqartussat piumasaqaatertik tunngavilersorpaat, eqqartuussivimmi suliassanngortinneqartut mianersuaalliorujussuarsimasut, taamani, sunaaffa suliffeqarfiup akiliisinnaajunnaalerfiani, 12.000.000 koruuninik qularnaveeqqusiiffigineqarnissamik qinnuteramik, uffa nalunngittussaagaluarlugu suliffeqarfik aningaaasanik amerlanerujussuarnik pisariaqartitsisoq.

Taava kinguninngua Puisi A/S akiliisinnaajunnaarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat