Eqqartuussinerit aallaqqaataaneerneqassapput

decembarip 13-at 2004 09:47

Sisimiut eqqartuussivianni ukiut marluk matuma siorna eqqartuussineq, kingorna nunatta eqqartuussviani nanginneqartoq, aallaqqaataaneerlugu suliarineqassaaq.

Eqqartuussiviit qullersaat, Højesteret, ullumi taama aalajangiivoq.

Højesteretimi eqqartuussisut isumaqarput 38-nik ukiullip Per Johansenip hashimik 17 kilomik paarsaqarlunilu tuniniaasimasutut oktobarimi 2002-mi Sisimiuni eqqartuunneqarnera naapertuilluanngitsumik ingerlasimasoq. Eqartuussut januaarimi 2003-mi Landsret-imi sakkortusineqarpoq.

Unnerluussisut eqqartuussissuserisuat Svend Larsen eqqartuunneqartullu illersuisua Manfred Petersen isumaqatigiillutik Højesteretimut qinnuteqarput eqqartuussinerit atorunnaarseqqullugit, tamannalu eqqartuussiviit qullersaata akuersissutigaa.

Sisimiuni taamani eqqartuussisuusoq Sofie Lennert eqqartuusseqataatalu aappaa, Højesteretip isumaa naapertorlugu aalajangiinialernerminni pituttorsimanngitsutut isigineqarsinnaanngillat. Eqqartuussisut taakku siusinnerusukkut suliami angutit marluk eqqartuussimavaat Per Johansenimut ikiuullutik hashimik paarsaqarsimasutut. Taamaalillutik Per Johansen pisuunersoq pisuunnginnersorluunniit aalajangertussanngoramikku eqqartuussisut pituttorsimanngitsutut isigineqarsinnaajunnaartut Højesteret isumaqarpoq.

Højesteretip aalajangiinera nunatta eqqartuussisuata Søren Søndergårdip tusaatissatut tiguaa.

- Aatsaavissuaq taama kukkusoqarpoq, eqqartuussivinnilu periaatsitut nalinginnaasutut oqaatigineqarsinnaanngilluinnarpoq, Søren Søndergård oqarpoq.