Narsarmiut isumaat Eqqartuussineq tamanut ammasuusariaqarpa?
Narsami pingasunngormat 20-nik ukiulik qulimiguulimmut mittumut aallaasersormat, inuit marluk aallaaneqarput, inuillu pingasut ikiligaapput, inuilli aallaasersornermik eqqugaasut inuunerminnik ulorianartorsiunngitsut Kalaallit Nunaannni politiit pingasunngormat ilisimatitsipput.
Sapaatip akunnerata siuliani tallimanngormat 20-nik ukiulik kujataani eqqartuussivimmi Qaqortumiittumi sassartinneqarpoq, unnerluussisussaatitaasullu piumasaat malillugu eqqartuussineq matoqqalluinnartumik ingerlanneqarpoq.
Unnerluussisut piumasaraat pisup pinarluinnartuunera pillugu aammalu misissuinerup aallarteqqammernera pillugu eqqartuussineq matoqqalluinnartumik ingerlanneqassasoq.
- Unnerluussisut illersuisullu suliartik eqqissillutik ajunnginnerpaamik inerneqarnissaa siunertaralugu taamatut aalajangersimassapput, Narsami najugalik Hans Josenius KNR-mut oqarpoq.
Matoqqalluinnartumik eqqartuussineq isumaqarpoq, eqqartuussineq matoqqasoq aamma qalleqqillugu matoqqasumik ingerlanneqassasoq.
Tamannattaaq isumaqarpoq kimilluunniit ilisimaneqarsinnaanngilaq qanoq eqqartuussisoqarsimanersoq aammalu pineqaatissiinerit suut atorneqarniarnersut.
Aatsaalli eqqartuussisoqarpat paasisaqarluartoqarsinnaassaaq.
Eqqartuussineq tamanut ammasuusariaqaraluarpoq
Narsami najugallit ilaat Karen Isaksen pisoq pillugu attortisimavoq aammalu toqqissisimanani. Taannali isumaqarpoq, innuttaasut kikkulluunniit eqqartuussinermut malinnaasinnaasariaqaraluartut.
- Isumaqarpunga saqquminerusumik nassuiaatitalimmillu ammasumillu paasissutissanik erseqqissunik saqqummiisoqarnissaa pingaaruteqaraluartoq, Karen Isaksen oqarpoq nangipporlu:
- Ippassaanikkunni pisoq pigaluarpoq sulili toqqissisimananngilaq taamaattumik eqqartuussineq ammasuusariaqaraluarpoq, Karen Isaksen oqarpoq.
Sassartitsineq videokkut attaveqatigiiffiuvoq
Angutip 20-nik ukiullip eqqartuunneqarnera kujataata eqqartuussiviani Qaqortumiittumi tallimanngormat videokkut ingerlanneqarpoq, eqqartuussinermi angut aallaasersortoq Narsamiippoq illersuisualu Nuummiilluni, tassalu imaappoq eqqartuussisoq dommeri aammalu unnerluussisoq kisimik eqqartuussivimmi matoqqalluinnartumi najuupput.
Unnerluutigineqartoq taassumalu illersuisuata inuttaat eqqartuussivimmiinngikkaluartut, Narsami innuttaasut isumaqarput, inuinnaat oqartussaaqataanerat atuuttariaqartoq:
- Soorunami inuk kinaluunniit illersorneqarnissaminut pisinnaatitaaffeqarpoq, pisimasoq alianaraluarpoq aamma pineqartup illersorneqarnissani pisinnaatitaaffigaa, Hans Josenius oqarpoq.
- Inuttaa tarnikkut nappaateqarsimassappat, sullissinerit sukumiinerusut ingerlanneqartariaqarput, Karen Isaksen oqarpoq.
