Eqqartuussineq pissanganartoq tallimanngorpat aallartissaaq

Canadamiumik ataatsimeeqateqarnermik aallartippoq. Taanna oqarsimavoq, puisip orsukulussunninnera peersinnaallugu. Puisi A/S-illu akiliisinnaajunnarneranit ukiut qulit qaangiutereersut tamatumunnga tunngasumik eqqartuussivimmi suliassaq tallimanngorpat aallartissaaq.

Oqaluttuaq puisit neqaannik pølsilianut, iginnermut, Kinamullu tuniniaanissarsuarmut takorluukkanut tunngasuuvoq.

Nanortalimmi tunisassiorfimmut, puisit neqaannik tonsimik ataatsimik pølsilioraluaannartumut, tunngasuuvoq.

Puisip neqaanut iginneranullu akisuallaarujussuarmut tunngavoq.

Kinami tunisassiorfimmik millionilikkaanik nalilimmut, takuniarneranili peqannngitsumut tunngavoq.

Tamakkua tamarmik 50 millionit koruunit sinnerlugit akeqarput:

- Oqartoqarsinnaavoq tamatta arlaatigut inuiaqatigiit annaasaqarpugut, tusagassiortoq Elna Egede oqarpoq.

Taassuma Puisi A/S-imut tunngasut qanimut malinnaaffiginikuuai, tassunga tunngasunik 60-it pallillugit allaaserisaqarluni.

Nangipporlu:

- Kalaallit Nunaani siuttut tassaasut naalakkersuisut, piginneqatigiiffiit annersaasa pisortaa, SIK-p siulittaasua, inatsisartut tamarmik. Ilaa, kikkut tamarmik taamani upperivaat, sunaaffa inuiaqatigiit 50 millionit koruuninik annaasaqalersut, Elna Egede oqarpoq.

Qanormiuna aallartittoq?

- Inuk qitiulluinnaqqissaartoq tassaavoq Canadamiu David Stevens. Kalaallit Nunaanni oqartussaasuninngaanniit naapinneqarmat aallartippoq, tusagassiortoq oqarpoq.

Canadamiu oqarsimavoq, puisip orsukulussunninnera persinnaallugu.

Taava takorloorneqarpoq, puisip neqaanik pølsiliortoqarsinnaasoq, Kinami tuniniagassanik.

Taamaammat Royal Greenlandip Nanortalimmi tunisassiorfia allanngortillugu suliarineqarpoq. Maskiinat puisip neqaanit pølsiliuutissat, pissarsiarineqarput.

Piginneqatigiiffiup pisortaqarfia siulersuisuilu nalunaarput, puisip orsua kiilumut 500 koruunilerlugu tunisinnaallugu. Aamma missingersuusiorput, puisip neqaanik pølsinik aamma puisip orsuanik iisartagalianik Kinami tunisisarnikkut, puisi ilivitsoq 11.000 koruunit sinnerlugit pissarsissutigisinnaalugu.

- Tunisassiorfik paasisavut malillugit ullut 14-it ingerlaneranni ataasiaannarluni pølsiliorpoq, kingornalu ingerlaqqinnani. Pølsit Kinamut assartorneqalermata aamma paasinarsivoq Kinamut tunisassiorsinnaanissamut akuersissummik piniartoqarsimanngitsoq, Elna Egede oqarpoq.

Taava suliffeqarfimmi aalajangerput, Kinami tunisassiorfiliortoqassasoq.

- Kingorna aamma paasineqarpoq Kinami fabrikkeqanngitsoq. Tassa aningaasat 7 millionit 330.000-it koruunit Kinamut aamma nuunneqareersut tamanna paasineqarpoq, Elna Egede naggasiilluni oqarpoq.

Tassalu suliassaq Nunatta Eqqartuussiviani tallimanngorpat suliarineqalissaaq, tassani isummerfiginiarneqassalluni, Puisi A/S-imut tunngatillugu siuttuusut akisussaatinneqarsinnaanersut.

Taanna pitinnagu. 2001-imi Naalakkersuisuusut marloriarlutik misissuisitsereerput.