Eqqartuussineq: Pinngitsuutitsineq aamma ukiut aappaa avillugu pineqaatissinneqarneq

37-nik ukiulik pinngitsuutinneqarpoq, 42-nillu ukiulik ukiup aappaata affaani pinerluuteqarsimasunut inissiisarfimmiittussangortinneqarluni. Juulliaqqap ullaavani Blok 14-imi aallaasersornerup kingorna eqqartuussineq aalassassimaarutaaqisoq taama inerneqarpoq.
Allattoq Jaaku Lyberth
februaarip 18-at 2010 16:09

Eqqartuussinermi 42-nik ukiulik ukiup aappaata affaani pinerluuteqarsimasunut inissiisarfimmiittussangorlugu aalajangiiffigineqarnera, toqumik kingunilimmik nakuusernerusimasutut eqqartuussisunit tunngavilersorneqarpoq. 37-nillu ukiulik aallaanninnermi najuuttoq, pinngitsuutitaasutut eqqartuussisunit iperagaasussanngortinneqarluni.

42-nik ukiullip illersuisuata Ulrik Blidorf-ip illersukkami iperagaanissaa piumasarisimagaluarpaa, Nuummilu eqqartuussiviup ukiup aappaata affaani pinerluuteqarsimasunut inissiisarfimmiittussangorlugu aalajangiiffigaa. 42-nik ukiullip illersuisuata unnerluussisuatalu pineqatissiineq pillugu ulluni 14-inik eqqarsarfissaqarusupput.

37-nik ukiullip Nuummi eqqartuussivimmit pinngitsuutinneqarluni iperagaatinneqarnera, unnerluussisup Nunatta Eqqartuussivianut suliassanngorteqqippaa, aalajangiiffiginissaatalu tungaanut unnerluussisup, Nuup Politiivineersup Gerth Kristiansenip tigummigallarneqarnissaa piumasaraa.