Eqqartuussineq ilinniaqataasa malinnaaffigaat

Qeqqani Ilinniarnertuunngorniarfimmi ilinniartoq 24-nik ukiulik ilinniartitsisumik saassussisimasutut qaammatini pingasuni isertitsivimmiittussanngorlugu eqqartuunneqarmat ilinniartooqatigisimasai 45-t eqqartuussivimmi malinnaapput.

24-inik ukiulik nassuerpoq Ilinniarnertuunngorniarfimmi pisortap tullia ajassimallugu niaquatigullu tillussimallugu, tamatumunngalu mianersoqqussummik tunineqarnini tunngaviusoq.

- Ilinniarnera paarilluaraluarpara, kisiannili tikilluaqqusaasutut misigisimanngilanga, 24-nik ukiulik oqarpoq. Siornatigut persuttaasimasutut akiligassinneqareersimavoq.

Ilinniaqatigisimasaata ilaat oqarpoq qanoq pineqarnissaa namminneq isiminnik takorukkamikku malinnaallutik. Isumaqarpoq pineqaatissiissut annikiginarsinnaasoq.

Annersagaasimasoq Pia Rosing Heilmannip 24-nik ukiullip qaammatini pingasuinnarni isertitsitsivimmiittuussanngortinneqarnera naammaginagu.

- Timikkut tarnikkullu annersarneqarpunga, tamanna uannut nuanninngilaq, Pia Rosing Heilmann oqarpoq.