Eqqartuussineq ajutuulersoq
2001-imi illorsuit marluliarsuit World Trade Center qaartinneqarnerinut atatillugut peqqarniisaarnianut peqataasimasup 20-issaata, Zakarias Mousavip eqqartuunneqarnerani, eqqartuussisut kukkuluttorsimanerat pissutaalluni unnerluussisut ajorsarsinnaapput.
- Ukiorpassuarni eqqartuussisutut sulisimaninni, aatsaat taamak kukkuluttornermik ingasatsigisumik takuvunga, eqqartuussisoq Brinkma oqarpoq.
Unnerluussisut kukkunerisa ilagaat, uppernarsaasutut peqataasussat pingaarutillit sisamat, paasissutissat isertuussat takusassarinngisaat, unnerluussisunit takutinneqartarsimammata, aammalu akissutissaasut sungiusartinneqartarsimallutik.
Taamatut pisoqarsimanera eqqartuussiniarnerup unitsinneqarneranik kinguneqartitsisinnaavoq.
Marokkomi inunngorsimasoq, Zakarias Mousavi, septembarip 11-ani peqqarniitsumik World Trade Centerimik saassussisoqarnissaa, sapaatit-akunnerinik pingasunik sioqqutsilluni, Missouri-mi tigusarineqarsimavoq. Taamanikkut Zakarias Mousavi timmisartornermik ilinnialeruttortoq tigusarineqarpoq. USA-p naalagaaffia isumaqarpoq Mousavi-p timmisartornermik sungiusarnera USA-mik saassussinissamik siunertaqarsimasoq, toqumillu pillagaasariaqartoq isumaqarfigineqarluni. Mousavi nammineerluni nassuereerpoq peqqarniisaarnianut Al-Qaeda-nut ilaasortaalluni, timmisartornermillu sungiusarnini tassaasoq, kingusinnerusukkut saassussinissamut sungiusarneq. Septembarip 11-ani saassussinernut atatillugu, Zakarias Mousavi kisiartaalluni eqqartuunneqartuuvoq.
