Eqqartuunneqarnissartik ilimagissanngilaat
Tigusat, amerikamiut tigusanut inissiisarfianni Guantanamomiittut, ilimagissanngilaat eqqartuunneqarnissartik piaarnerpaamik aalajangiivigineqarluni naammassineqassasoq. Sakkutuut unnerluussisussaatitaat ippassaq ajorsarujussuarput eqqartuussisut suliassat marluk suliarinissaat itigartitsissutigimmatigit – tunngavilersuutigineqartut atorsinnaanngimmata.
Eqqartuussisut suliassanik marlunnik tunuartitsinerat quiassuaatissaannaavorluunniit.
Suliassiissutaasuni amigaatigineqarmata, suut tunngavigalugit amerikamiut tigusanik Guantanamomut inissiisimanersut, inissiinermi nunat tamat tunngaviusumik inatsisaat naliginnaasut avaqqullugit iliortoqarsimammat.
Amerikamiut tunngavilersuutiginiarsimavaat, tigusat Guantanamomiittut, akeraasut sorsukkumatuut, unioqqutitsillutik amerikamiunut sorsussimasut, taamaattumillu sorsunnermi tigusatut allatulli Genevemi isumaqatigiissut malillugu pineqarnissartik tigusat noqqaassutigisinnaanngikkaat, aallaqqaammulli amerikamiut taamatut nassuiaateqarput.
Ippassarlu eqqartuussinermi suliat tunuartitsissutigine-qarmata taamatoqqissaaq pisoqanngilaq. Tigusanut marluusunut suliassiissutigineqartuni taamaallaat allassimasimavoq ”akeqqat sorsukkumatuut” allassimasussarlu amigaataasimasoq tassaasimavoq
”unioqqutitsisumik” imaanniartussaasimagaluarmat ”unioqqutitsisumik akeqqat sorsukkumatuut”
Siornalu amerikamiut inatsisartuisa tigusat eqqartuunneqarnissaannut atorneqartussaq akuersissuti-gisimasaat tassaavoq ”unioqqutitsisumik akeqqat sorsukkumatuut” taanna atorneqarluni aatsaat unnerluussisoqassasoq.
Eqqartuussisullu tigusanik marlunnik eqqartuussiner-minni unnerluussissutaasuni inatsisit malillugit eqqartuussissallutik tunngavissaqarsimanngillat, Taamaalillunilu suliap ingerlaqqinnissaa itigartitsissutigineqarsimalluni. Eqqartuussisinnaajun-naarneq Guantanamomi tigusanut 380-inut aamma atuutissaaq, tigusat tamarmik killisiorneqarnikuupput, akeqqanik sorsukkumatuunik taallugit, siornatugaatigut unioqqutitsisortaqaratik.
Eqqartuusseqqinnissaq aallaqqaataaniik ingerlanneqaqqissappat tigusat unioqqutitsisunngortinneqaqqaassapput. Piffissarlu sivisoorujussuaq atoqqaarlugu eqqartuusseqqinnissaq atsaat ingerlanneqaqqissinnaavoq. Illersuisussaatitaasut kiisalu Inuit Pisinnaatitaaffiinik Illersuiniaqatigiit kaammattuutigaat, tigusat inuinnaat eqqartuussiviini eqqartuunneqassasut.
