Eqqarsartaatsimikkut innarluutillit naapeqatigiittut
Eqqarsartaatsimikkut innarluutillit 70-it missaaniitut Kujataani Ammassivimi ulluni makkunani katerisimaarput. Ilisarisimanerulernissaq, timersornikkullu naapeqatigiitarnissaq siunertaalluni.
Eqqarsartaatsimikkut innarluutillit Nuummiit Nanortalik tikillugu najugaqarfinni bokollektiv-ini taaneqartartuni najugallit Amassivimmi naapeqatigiinerat sapaatiuppat tungaanut ingerlanneqartussaq Nanortalimmiit aaqqissuuneqarpoq. Ilulissat ilanngullugit peqataasoqarnissaa anguniarneqarsimagaluarpoq, aningaasassaaleqisoqarmalli tamanna iluatsinneqarsimanani.
Eqqarsartaatsimikkut innarluutillit ilisarisimanerulernissaat, timersornermillu aallutallit timersortinneqartarnissaat siunertarineqartoq aaqqissuusinermi ataqatigiisaarisoq Nanortalimmi Ullut-neersoq Jonas Kristiansen oqarpoq.
Nunatta kujataani eqqarsartaatsimikkut innarluutillit katerisimaartarnissaat eqqarsaataavoq, ukioq mannalu ukiup aappassaa taamatut Ammassivimmi aaqqissuusisoqarpoq.
-Aallaqqaamut pilersaarusioqqaaleratta avannaa tungaaniit Ilulissat tikillugit peqataasoqarnissaa anguniarsimagaluarparput, aningaasassaaleqisoqarneralu pissutaalluni tamanna iluatsissinnaasimanngilaq, Jonas Kristiansen oqarpoq. Neriuutiginerarpaalu aapaagu nunatta avannarpasinnerusortaanniit aamma peqataasoqarsinnaasasoq.
