Eqqarsaqatigiit suliassaat pingaarnersiorneqaleruttorput

Ileqqussat pillugit Kalaallit Nunaanni Eqqarsaqatigiit suliassaanni sorliit pingaarnerutissanerlugit, Peqqissutsimut Avatangiisinullu Naalakkersuisoq, Agathe Fontain, maanna nalilersuileruttorpoq.

Apeqqutinut ilaavoq inuunerup kipineqarnissaanut ikiuunnissamut tunngasoq. IA-meersumut Olga P. Berthelsenimut, inuunerup kipineqarnissaanut ikiuuttarnissaq pillugu apeqquteqaateqarsimasumut, Peqqissutsimut Naalakkersuisoq taama akissuteqarpoq. Apeqqulli taanna nalilersuinermi qanoq pingaaruteqartigisutut inissinneqassanersoq, Agathe Fontainip akissutaani ersinngilaq.

Ileqqussat pillugit eqqarsaqatigiit siorna juunimi pilersinneqarput, 13-inillu ilaasortaqarlutik, Kalaallit Nunaanni tamarmi agguataarsimasunik. Ataatsimiinnermi siullermi siulittaasussatut toqqarneqarpoq Carl Christian Olsen.

Attaveqaatitigut teknologi nutaaliaasoq ikiorsiullugu Peqqissutsimut Pisortaqarfimmit ilaasortanut qarasaasiakkut immikkut ittumik oqaloqatigiittarfimmik pilersitsisoqarnikuuvoq.

Apeqqutinut ataasiakkaanut Eqqarsaqatigiit naliliineri isummernerilu ilitsersuutitut isikkoqartassapput, siunertaanngilarlu isumaqatigiittoqarsimassasoq. Isummiussalli assigiinngitsut nassuiarneqarsimasassapput inassuteqaammi Eqqarsaqatigiinnit Naalakkersuisumut tuniunneqartartussami.