Eqqanaarsarneq GE-p siooranartinngilaa

Mamakujuit, qummoroortartut sunoorsillu kingumut aamma atuuttumik akitsuusersorneqartut Naalakkersuisut nalunaarutigaat.

Eqqanaarsartoqannginnissaa matumani siunertaasoq aamma nalunaarutigineqarpoq. Sulisitsisulli peqatigiiffiat GE allatut isumaqarput:

- Taama tunngavilersornissamut tunngavissaqanngitsoq isumaqarpugut, kingumut atuuttussamik akitsuusersuisoqarnissaanut tunngavissaqarsorinngilarput, Lars Krogsgaard-Jensen, GE-mi inatsisilerinermi siunnersorti oqarpoq.

Eqqanaarsarneq nunatta karseanut ajorpoq

Innuttaasut akitsuutit atuutilersinneqannginneranni mamakujuppassuarnik qummoroortaaterpassuarnillu eqqanaarsarnissaat Namminersorlutik Oqartussat pinngitsoortinniarsariinnaraat, taassuma oqaatigaa:

Inuppassuit taama eqqanaarsarpata akitsuummit isertitat ikinnerulissapput, aningaasanullu inatsit amigartooruteqarnerulissalluni.

Inuilli eqqanaarsarnerat annerusumik ajornartorsiutaanavianngitsoq sulisitsisut GE isumaqarput.

Akitsuutit qaffanneqarpata inuit atuinikinnerulissasut inuit amerlasuut taama oqassagunartut, Lars Krogsgaard-Jensenip itisiliinermini ilaatigut oqaatigaa:
 

Akit sungiunneqarumaarput
- Aamma tamanna ilumuussagunarpoq, Krogsgaard-Jensenip nassuerutigaa.
Sukkulaatilli lakridsillu akitsornerat innuttaasut sungiukkumaaraat, GE isumaqarpoq:

- Atuisoqaqqilerniassammat, siornatigutulli immaqa annertunnngitsigisumik, atuinerusoqaqqilerluni, Lars Krogsgaard-Jensen oqarpoq.

Sulisitsisut tamanna aallaavigalugu ima inerniliipput:

- Eqqanaarsarniartoqarsinnaaneranik aarleqquteqarnissamut tunngavissaqanngilaq, GE taama isumaqarpoq, Sulisitsisuni inatsisilerinermi siunnersorti Lars Krogsgaard-Jensen oqarpoq.