Kielsen: Eqqakkat nunatsinniit anninneqassapput
Saliinissamut ukiunut tulliuttunut arfinilinnut katillugit 180 millionit koruunit immikkoortinneqarput. Tamanna Naalakkersuisut siulittaasuata, Kim Kielsenip, danskillu avatangiisinut inuussutissanullu ministeriata, Esben Lunde Larsenip (V) Københavnimi ullumi atsioqatigiissutigivaat.
-Isumaqatigiissutigaarput Danmarkip Kalaallit Nunaatalu akornanni ataatsimoorussamik aqutsisoqatigiinnik pilersitsissasugut, najukkami innuttaasut peqataatillugit sumiiffiit salinneqarnissamik pisariaqartitsisut sumiissusersissallutigit, danskit avatangiisinut inuussutissanullu ministeriat Esben Lunde Larsen ullumi tusagassiortunik katersortitsinermi oqarpoq.
AAMMA ATUARUK Sakkutooqarfiusimasut salinneqarnissaannut immikkoortinneqartut amerlineqartut
Isumaqatigiissut Naalakkersuisut siulittaasuata Kim Kielsenip naammagisimaarpaa. Aningaasallu isumaqatigiissutigineqartut naammanngippata isumaqatigiissut sivitsorneqarsinnaasoq, KNR-imut oqaatigaa.
Kim Kielsen naapertorlugu eqqakkat nunatsinniit anninneqassapput:
- Uani massakkut nalunaarsornerit najoqqutaralugit misissorneqassapput, taakku eqqakkat. Taava sapinngisarput tamaat avammut ingerlanneqassapput. Nunatsinni matoorneqaannassanngillat. Pituffimmi ajornartorsiutigaarput, taamanikkut nuna, tassa issoq, mingutsinneqarsimasoq Europamut eqquteqqusaanngitsoq. Allatut ajornaqaaq taavunga matoorneqarput. Taanna pinaveersaartariaqarparput. Sapinngisarput tamaat massakkut annissorneqarnissaat qulakkeerniarsarisussaavarput.
Pineqartoq Kim Kielsenip innersuussutigisaa tassaavoq amerikamiut eqqaavigisimasaannik saliinissaq. Eqqagassalli aallarunnagit nunamut matoorutiinnarneqarsimapput, tassalu taakku Naalakkersuisut siulittaasuata qallortillugit nunatsinniit aallaruteqqusai.
