Eqqakkanik isumaginninnissamut pilersaarusioraluarlutik aappaagumut aningaasaliinngillat
Nunaqarfiit ilaanni ikuallaaveqanngilaq, ikuallaaviliarianeqaraluartullu ilaat atorsinnaanatik.
Eqqakkat pillugit ajornartorsiutit iliuuseqarfiginiarneqartut ilisimaneqarpoq, piviusunngussanersulli siunissap takutikkumaarpaa. ”Eqqagassat pillugit iliuusissatut pilersaarusiaq 2009 – 2012” avatangiisinut naalakkersuisoqarfimmit marsip qaammataani saqqummersinneqarpoq, iliuusissatut pilersaarusiaq 1996-imeersoq 2003-meersorlu taarsertussaallugit.
Pingaarnertut anguniakkat qimerluualaaraanni takuneqarsinnaavoq silaannarmik, imermik, sermimik nunamillu mingutsitsineq pinaveersaartinniarneqartoq, eqqakkanillu isumaginninnerup avatangiisinut peqqissutsimullu isumannaatsumik suliarinissaat anguniarneqartoq.
Ikuallaasarnermik aaqqissuussinerit pilersaarusiami aamma ilanngunneqarput:
- Kingusinnerpaamik 2009-mi illoqarfinni akunnattumik angissusilinni, illoqarfinni mikinerusuni, kiisalu Nuup illoqarfiani ikuallaasarnermik aaqqissuussinermut periusissaq aalajangerneqassaaq, iliuusissatut pilersaarusiami allassimavoq.
Ikuallaasarnermik aaqqissuussinernut aaqqissuussinerit sanaartornerit kingusinnerpaamik 2010-mi aallartinneqassapput.
Eqqagassalerinermut atatillugu aningaasartuutissat 2009-miit 2020 tikillugu 400 millioni koruunit pallillugit aningaasartuuteqarnissaq ilimagineqarpoq.
Ukiunut pilersaarusiorfiusunut 2009 – 2012-imut anguniakkat saniatigut siunissamut piffissarititamut 2013 – 2020-mut piviusumik anguniakkanik inissitsitikkanik peqarpoq.
”Eqqagassat pillugit iliuusissatut pilersaarusiaq 2009 – 2012” naappat nalilersuisoqassaaq.
