Saamerleq, Adam Tobiassen saamerlermi aamma talerperleq Nikolaj Gabrielsen. Assi: KNR

Eqqaavissuarmi ikuallattoqarnera: Adamip mingutsitsineq arleqqutigalugu imermik pisiniartarpoq

Ilulissani innuttaasut ilaasa Ilulissani imeqarfik ikuallattoqarnerani mingutsinneqarsimanissaa aarleraat. Namminersorlutik Oqartussat Nukissiorfiillu eqqissisaapput.

- Uagut imermik pisiniaqattaarpugut, tassa tusaratsigu inuit ilaasa aarleqqutigigaat, Adam Tobiassen oqarpoq.

Taanna KNR-ip Ilulissani eqqaavissuarmi sapaatit-akunneri marluk sinnerlugit ikuallattoqarnera pillugu innuttaasunik oqaloqateqarniarluni angalaarnerani naapitaasa ilagaat

Innuttaasummi ilaasa ikuallattoqarneranik erngup mingutsinneqarsinnaanera ernummatigaat.

- Uanga ullormut 1 literi pisiarisarpara. Tassa eqqaaviup ikuallannerup kingunerisaanik aarlerinartoqarama. Assigiinngitsorpassuarnik taanna imaqarami. (...) Imeqarfik pinngitsoorami aamma mingutsinneqarpoq, Nikolaj Gabrielsen oqarpoq.

AAMMA ATUARUK Dag 13 med dumpbrand i Ilulissat: Meget trætte brandfolk

Nukissiorfiit Naalakkersuisulluunniit imeqarfiup erngata mingutsinneqarsinnaasimaneranik maannamut suli nalunaaruteqanngillat.

Nikolaj Gabrielsenili isumannaannerusumiinniarluni erngup kuuffianik imernani pisianik imigaqarpoq:

- Tassami sissuerluni aamma pigaanni taanna qaninnerpaajugami, taanna oqarpoq.

Assi: Nuka-Marie Karlsen.

 

Nuka-Marie Karlsenip imeqarfiup mingutsinneqarsimasinnaanera tusaqqammerpaa. Tamannalu ernumassutigilerpaa:

- Eqqarsaatigalugumi pujorsuaq maanga illoqarfiup imeqarfiullu tungaanut ingerlaleraangat taama akuutissai ulorianarpalutsigisut soorunami ernumassutissaqalaarpunga, taanna oqarpoq.

Taamaammat pisiniarfinnit imermik pisinissani maanna isumaliutigilerpaa.

- Taama eqqarsaateqarsinnaavunga.   

Nukissiorfiit pissutsit malinnaaffigaat

Pinngortitamut Avatangiisinullu Naalakkersuisoqarfiup eqqaavissuarmi ikuallattoqarneranit imeqarfimmut paamik katersuuttoqarnissaanut aarlerinartoqanngitsoq nalilerpaa.

- Eqqaavissuup ikuallanneranit imeqarfimmi paaqalersimanissaa Nukissiorfinnit uppernarunnaarsinneqarpoq, naalakkersuisoqarfiup pisortaa, Mette Skarregaard Pedersen KNR-imut oqarpoq, nangillunilu:.

- Imeqarfimmut tatsimi suli sikuerutivinnanilu aputaarutiginngilaq, sumiiffimmilu aakkiartortoqarnera ukiullu nikikkiartornera pissutigalugu aput sikuluunniit mingutsitsinertut, pujoralattut assingusutulluunniit aput ipeqartutut isikkoqarpoq, Mette Skarregaard Pedersen oqarpoq.

Assi: Ilulissani imeqarfik. Nukissiorfiit.

 

Taamaammat ”aput ipeqartoq” imeqarfiup pujormit mingutsinneqarsimasinnaanera pasineqartoq, aputip aakkiartorneranik pissuteqartutut nalilerneqarpoq.

AAMMA ATUARUK Brand i Ilulissat: Gammelt jernskrot gør slukning svær

Taamaakkaluartorli Nukissiorfiit imeqarfiup pilersuutaanit misissugassamik tigusisarluni pissutsit malinnaaffigaat.

- Erngup putsumit eqqaavissuullu ammaannartumi ikuallanneranit mingutsinneqarsinnaanera ukkataringaatsiarparput. Ilulissani immikkut ittumik pisoqarnera pissutigalugu Nukissiorfiit misissugassamik tigusisarnerani annertusisamik suliaqartoqarpoq, Nukissiorfinni teknikkeqarnermut pisortaq, Kenneth Nyland oqarpoq.

Taassuma Pinngortitamut Avatangiisinullu Naalakkersuisoqarfik suleqatigalugu imeq misissuiffigeqqissaarneqartoq ilanngullugu oqaatigaa.

- Erngup salinneqanngitsup salinnikullu misissorneqareernikuuvoq. Sapaatip-akunnerani matumani nutaamik misissueqqissaartoqaqqissaaq, Kenneth Nyland oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat