Eqqaavikut piaartumik salinneqaqquaat
Saliisoqartariaqarpoq, taama isumaqarpoq Demokraatit siulittaasuata tullia, folketingimullu qinigassanngortittoq Palle Christiansen.
Piffissanngorpoq amerikamiut qimataasa salinneqarnissaat, suliniarnerlumi sukkaappallaaqaaq.
Amerikamiut Pituffimmi eqqaavigisimasaasa nalunaarsornerat naammassereerpoq, paasissutissallu tamarmik pigineqalereerput. Nunarput eqqiluitsuusoq avammut nittarsaanniarutsigu saliisoqartariaqarpoq.
Kalaallit nunaanilu eqqaaviusarsimasut tamarmik aamma salinneqartariaqarput, Danskillu naalagaaffiat kisimi saliinermut aningaasaliissaaq, Palle Christiansen oqarpoq.
Tunngavilersuutigaa mingutsitsisoqalermat danskit naalagaaffiat avatangiisinut inatsisaa kisimi atuummat, danskit kisimiillutik akisussaaffigigaat.
Demokraatineersoq aamma isumaqarpoq qinigaaffiup tulliani eqqaaviusimasut nunatsinniittut sisamararterutaat salinneqareertariaqartut.
Eqqaavissuillu sinneri ukiut qulit qaangiuppata salinneqareerlutik oqaluttuaannanngorsimassasut.
